3,7 millóns para os gandeiros chantadinos

A Consellería do Medio Rural e do Mar, a través do Fondo Galego de Garantía Agraria -FOGGA-, ordenou nas últimas semanas a transferencia de preto de 3,7 millóns de euros -3.648.806 euros- en pagos dos que se benefician 417 agricultores e gandeiros do concello de Chantada. Esta medida foi anunciada pola delegada territorial da Xunta en Lugo, Raquel Arias, que expuxo que estas partidas corresponden a varias axudas directas da Política Agraria Común -PAC- a explotacións agrogandeiras, solicitadas e financiadas polo Fondo Europeo Agrario de Garantía (FEAGA).

Vacas nunha explotación gandeira na comarca chantadina. EC

PAGADO CASE O 100%

Esta cifra é o resultado da suma das partidas abonadas no mes de outubro como anticipo -máximo 50% da axuda do pago único- máis as achegas realizadas para axudas directas formalizadas entre o remate do pasado ano e o inicio do presente. O feito de anticipar os pagos ao comezo do prazo “supuxo que a Consellería do Medio Rural xa teña practicamente efectuado o 100% dos pagos directos da PAC”, significou Arias. O pago máis importante realizado é o correspondente ao réxime de pagamento único por explotación, desligado da produción, que se ven aplicando desde o ano 2006, e que, en concepto de anticipo máis saldo, supuxo no municipio chantadino un importe de algo máis de 1,8 millóns de euros. Dende a delegación teritorial explicaron que tamén se realizou o pago adicional no sector lácteo, unha achega que ten por obxectivo a mellora da calidade do leite producido nas explotacións e da que se beneficiaron 280 gandeiros con explotacións no municipio de Chantada e que recibiron un importe total de 160.099,23 euros.

“MÁIS LIQUIDEZ”

Por outro lado, 278 produtores de leite chantadinos perciben un pago extraordinario para o sector lácteo co que se pretende compensar as desvantaxes que comporta producir nunha zona considerada como economicamente sensible desde o punto de vista medioambiental e desfavorecida. A axuda que agora reciben estes gandeiros de leite supón un total de 571.894,24 euros. Ademais veu realizándose o pagamento dunha partida que compensa o emprego de recursos forraxeiros e que no caso de Chantada beneficiou a 93 gandeiros, que percibiron unha cantidade de 510.809,93 euros. Que nesta campaña se acurtara o período de pagamento establecido pola Unión Europea -que, na presente campaña, vai dende o 1 de decembro do ano 2011 ata o 30 de xuño do 2012- permite, segundo concluíu Raquel Arias, que “os gandeiros dispoñan de maior liquidez para optimizar o rendemento das súas explotacións”.

Deixa unha resposta

Your email address will not be published.

Nova Anterior

O filme «Vilamor», no IES Lama das Quendas

Seguinte Nova

O primeiro tramo do corredor Sarria-Monforte abrirase en 2012

Últimas noticias sobre ECONOMÍA

A %d blogueros les gusta esto: