• O mes de marzo acolle dúas importantes efemérides que a Área de Cultura e Turismo, e Benestar e Deporte está a conmemorar de forma conxunta. O Día da Muller Traballadora e o da Clase Traballadora Galega, celebrados os pasados 8 e 10 de marzo, respectivamente, van ser os protagonistas dunha programación multidisciplinar que abranguerá a totalidade do mes, e que servirá, segundo os responsables provinciais, “para facer unha reflexión sobre a situación laboral da muller”.
IGUALDADE DE XÉNEROS A TRAVÉS DA ARTE
Baixo o título “A arte de ser muller nun mundo por compartir 4.0”, a Vicepresidencia da Deputación de Lugo deu comezo a unha serie de actividades artísticas multidisciplinares que se están a desenvolver en marzo no Museo Pazo de Tor de Monforte, no Museo Provincial de Lugo, e nos outros dous espazos vinculados á Rede Museística Provincial, así como na sala de exposicións do Pazo de San Marcos, sede da Deputación. 33 artistas (32 mulleres e 1 horme) amosarán xuntos as súas creacións na exposición que dá título a esta programación, e que ten como obxectivo facer máis visible a muller dentro do mundo da arte. “A arte de ser muller nun mundo por compartir 4.0” permanecerá aberta ao público no Pazo de San Marcos ata o vindeiro 8 de abril.
PERFORMANCES, MESAS REDONDAS E CONFERENCIAS AO LONGO DO MES
Previamente á inauguración desta exposición, a escritora e profesora universitaria Teresa Moure abriu o ciclo de actividades en conmemoración do Día da Muller coa conferencia “Muller e literatura”, impartida no Refectorio do Museo Provincial de Lugo. O xoves 15 de marzo ten lugar unha mesa redonda sobre “Xestión cultural e xénero”, ás 18 horas no Pazo de San Marcos, e ás 19,30 horas Susana Sánchez Aríns protagonizará un recital poético na mesma sede. “Quen lle dá a volta á tortilla?” é o título da exposición que se inaugura o venres 16 no Refectorio do Museo Provincial de Lugo ás 20 horas, que estará seguida da performance “Estamos (I) somos (+D)”, a cargo de Yolanda Herranz. A relación conceptual entre muller e arte será o punto de reflexión no Pazo de San Marcos o luns 19 ás 18 horas, coa conferencia “Imaxe da muller na arte”, a cargo de Gema López, mentres que ás 19,30 horas Montse Cea disertará sobre “A obra de muller como categoría artística”. Muller e discapacidade serán os temas de debate da mesa redonda prevista para o mércores 21 de marzo. Baixo o título “O empoderamento de mulleres con discapacidade a través do emprego”, responsables de ACADAR (Asociación de Mulleres con Discapacidade de Galicia) e persoal con discapacidade dos museos da Rede Provincial debatirán sobre esta importante cuestión vinculada ao Día da Muller Traballadora. Literatura e sociedade protagonizan a sesión do día 23, coa conferencia “Rosalía de Castro: a creación da identidade”, a cargo de Francisco Rodríguez, no Pazo de San Marcos. Nesta mesma sede, o 3 de abril Ana Gesto desenvolverá a súa performance titulada “Intervalos variables 5”, ás 20 horas.
O Pazo de Tor acollerá o Festival Internacional Euroárabe Amal sobre mulleres traballadoras do 20 ao 23 de marzo
“Monecas, unha muller de Damasco” é o filme que abrirá en Monforte o Festival Internacional Euroárabe Amal, que se celebra simultáneamente nas catro sedes da Rede Museística Provincial. O Pazo de Tor acollerá a proxección dos filmes vinculados á temática “Mulleres traballadoras”, entre o 20 e o 23 de marzo ás 19 horas. O mércores 21 proxectarase un trío de curtas, tituladas “Un día en Smara”, “Prohibido o paso” e “Beirut”. A programación para o xoves 22 está composta asimesmo por tres pezas breves, “A muller policía”, “A miña moneca de trapo” e “A criada”. O ciclo rematará o venres 23 coa proxección das curtas “Sensibilidade en feminino”, “O do da cigoña” e “Fiasco”. Pola súa parte, o Museo Provincial de Lugo acollerá os filmes agrupados baixo o denominador “Magreb”. O Museo Fortaleza San Paio de Narla, en Friol, será a sede das proxeccións vinculadas á “Inmigración”, e o Museo do Mar en San Cibrao (Cervo) acollerá o bloque “Mozos e mozas”.
OBRADOIRO EN TOR
A programación multidisciplinar deseñada dende a Vicepresidencia provincial ofrece un obradoiro itinerante polas catro sedes museísticas da Rede, baixo o título “Nos zapatos da muller Orquestra. Accións, reflexións e rol da muller nos camiños da historia” e a cargo de Adriana Pazos Ottón. Dentro deste obradoiro, a sesión denominada “Muller, acción social e diversidade funcional” terá lugar no Pazo de Tor o 23 de marzo de 18 a 20 horas.
ITINERARIOS EN FEMININO
A programación en torno ao Día da Muller Traballadora ofrece visitas guiadas ata o 8 de abril aos catro museos da Rede provincial, nos horarios habituais de apertura ao público.
