Transformar o sector turístico galego a través da formación dos seus empresarios é o obxectivo do Plan de Formación para a Excelencia Turística de Galicia, que supón unha iniciativa pioneira no Estado, cunha inversión de case un millón de euros.
Durante a presentación deste plan, a secretaria xeral para o Turismo, Carmen Pardo, destacou que se trata dun proxecto moi ambicioso e pioneiro no Estado, que implica que “entre 500 e 600 profesionais galegos teñan a oportunidade de asistir a máis de 4.109 horas de formación en xestión, en modalidade presencial e online, o que lles permitirá compaxinar a actividade laboral coa formación, ademais de contar coa axuda de titorías personalizadas”.
Segundo informaron os responsables desta iniciativa, o Plan tentará dar resposta ás necesidades da oferta turística de Galicia, que debe adaptarse aos cambios da demanda, ás preferencias dos consumidores, á competencia, ás canles de comercialización e aos novos requerimentos do mercado que esixen actuacións globais como a que hoxe se presentou en materia de formación.
O programa artellarase en 13 tipoloxías de cursos adaptados ás necesidades concretas dos distintos subsectores. Trátase de 24 programas formativos en toda Galicia nos que poden participar entre 20 e 30 persoas en cada grupo. O plan centrarase en áreas estratéxicas de turismo como a innovación, o e-marketing, as redes sociais, a xestión de pequenos aloxamentos e restaurantes, a eficiencia, o aforro e a xestión de custes, ademais da creación de empresas. O Ministerio de Industria, Enerxía e Turismo e o Fondo Social Europeo a través da Escola de Organización Industrial, investirán neste plan un total de 838.296 euros, un 90% do orzamento total. O 10% restante será aportado pola Secretaría Xeral para o Turismo a través de Turgalicia e do Centro Superior de Hostelería de Galicia.
