A Xunta de Goberno da Deputación de Lugo aprobou recentemente a constitución da Empresa Provincial de Turismo, que será xestionada cun carácter fundamentalmente público. Así, acordouse crear unha comisión de estudo composta por membros da propia Xunta de Goberno e persoal técnico da Deputación, que será a encargada de propoñer o acordo de creación desta empresa para que o pleno da Deputación a aprobe definitivamente. Os responsables da Área de Turismo provincial destacaron “a importancia de que nestes tempos debe ser o sector público quen dinamice e incentive o crecemento económico apoiando ao sector privado”.

DESESTACIONALIZAR, DIVERSIFICAR E COORDINAR COA INICIATIVA PRIVADA

Mario Outeiro, delegado de Cultura e Turismo da Deputación, anunciou que están a cumprir os prazos sinalados para que antes do verán estea en funcionamento a Empresa Provincial de Turismo. Outeiro lembrou os obxectivos cos que se proxectou este novo ente, e que se centran na desestacionalización da actividade turística, ofertando destinos fóra da temporada alta; a diversificación da oferta turística, mediante a elaboración de novos paquetes que poñan en valor o patrimonio natural e artístico de Lugo; e a coordinación da promoción entre a iniciativa pública e privada. Outeiro destacou a “aposta polo benestar e o emprego” que supón a constitución da Empresa Provincial de Turismo “como unha ferramenta para potenciar unha actividade económica que representa xa o 13% do noso PIB e que ten aínda máis percorrido e unhas enormes potencialidades”. Outeiro explicou que “se garante o carácter fundamentalmente público da empresa que creamos e contaremos na mesma coas principais asociacións que agrupen as empresas ligadas co turismo, hostalería, casas de turismo rural e os diferentes territorios de Lugo”.

RUTAS FLUVIAIS

Por outra banda, o responsable provinvial informou de que o SUPLUSA seguirá a xestionar as rutas fluviais ata maio. Asimesmo, seguen activas a ruta do Miño desde a aldea de Belesar á ínsua de Maiorga, con saídas de mércores a domingo, e outra en Doade, que percorre os canóns do Sil de mércores a domingo, e en Semana Santa todos os días.

Apoio ao Entroido Ribeirao

O presidente da Asociación de Amigos do Entroido Ribeirao, Juan Carlos González Pérez, foi recibido na Deputación de Lugo por Mario Outeiro e asinaron un convenio de colaboración polo que o organismo provincial aportará 4.000 euros para contribuír cos gastos xerados polas actividades que organiza a asociación ao longo do ano. Esta aportación supón un 30% do orzamento de gastos do colectivo chantadino para este ano, que está cifrado en 14.000 euros.

“IDENTIDADE E CULTURA PROPIAS”

O delegado de Cultura da Deputación gabou “o traballo a prol da tradición e da cultura da Ribeira Sacra que esta asociación leva facendo desde os seus inicios”, e insistiu na “necesidade de que a Administración apoie a recuperación destas iniciativas”, xa que son “unha mostra do noso pasado como pobo e reflexo dunha identidade e dunha cultura propias”.