Maiorga, nova apertura en Semana Santa

A área fluvial que foi obxecto de varias intervencións agarda o efecto dun esforzo promocional de futuro

A área de Maiorga é propicia para o turismo e o esparcemento grazas á súa singular situación. Arquivo EC

O regreso do servizo dos catamaráns na Ribeira Sacra durante a Semana Santa coincidirá coa reapertura dos servizos da área turística de Maiorga, na ribeira do Miño en Pantón. A aposta por esta zona como unha referencia para o desenvolvemento turístico do municipio e como un dos rincóns singulares do conxunto da Ribeira Sacra segue a ser unha constante nos últimos anos, e o traballo por promocionala e consolidala plenamente é unha materia aínda en curso, pero na que se teñen avanzado diversas actuacións. A implicación dalgúns organismos neste asunto a través de distintas obras fixo posibles os accesos dende a zona alta e dende a beira do río a unha área con un importante potencial, abandonada por mor do paso do tempo e o sino demográfico do rural máis profundo.

Unha zona para a aterraxe de helicópteros de cara a diversos servizos instalada nos primeiros momentos; a preparación dunha praia fluvial case testemuñal e que precisa dos últimos detalles de acondicionamento; a creación dunha viña experimental como mostra e testemuño da actividade vitivinícola tan ligada ao concepto turístico da Ribeira Sacra; a mellora dos accesos a viñedos do contorno; e sobre todo a rehabilitación da chamada Casa do Barqueiro destinada a bar-restaurante e á venda de produtos da terra, foron actuacións suficientes para colocar a área de Maiorga entre os puntos de maior interese para o visitante. O Concello de Pantón, a Deputación de Lugo, a Xunta de Galicia a través da concesión do obradoiro de emprego que logrou realizar un lavado de cara desta área a través de diversos traballos, e tamén o Ministerio de Medio Ambiente mediante fondos europeos para a creación do embarcadoiro, realizaron pequenas achegas en distintas fases.

O COMPLEMENTO DA MÍLLARA

A rehabilitación da aldea de A Millara, moi próxima a Maiorga, por parte da iniciativa privada, foi un proxecto paralelo que pretende contribuír á posta en valor da zona ao tempo que revitalizou a actividade vitivinícola poñendo un espazo importante en produción. Neste caso, a Deputación sufragou a instalación dunha valla quitamedos de madeira nos viais de acceso, outra das actuacións recentes no acondicionamento destes lugares. A entrada en funcionamento destes servizos a partir da Semana Santa abre a tempada turística e supón para o alcalde de Pantón, José Luis Álvarez, unha nova oportunidade na consolidación de Maiorga, na que ten e terá unha responsabilidade importante o feito de que dúas rutas de catamarán -a de Peares e a de Belesar- fagan parada neste lugar singular próximo á illa de Maiorga ou illa de Sernande. Por outra banda, algunha empresa está xa interesada en tomar as rendas e potenciar este complexo a medio ou longo prazo. Álvarez valora o enorme potencial de Maiorga para o municipio, pero non esquece que agora hai que centrar o traballo na grande materia pendente, a da promoción. “Sempre se falou da ruta do Sil, e dos canóns, agora falta por amosar ao mundo a do Miño”.

Deixa unha resposta

Your email address will not be published.

Nova Anterior

Aprobadas as obras do PEIM Rural para arranxar diversos viais en Pantón

Seguinte Nova

Compostaxe doméstica en Chantada

Últimas noticias sobre ECONOMÍA

     
A %d blogueros les gusta esto: