O complexo medioambiental de Sogama en Cerceda (A Coruña) acolleu a visita de preto de 50 escolares de 5º e 6º curso de Primaria do colexio sarriano La Asunción. O alumnado visitante puido coñecer de cerca a actividade industrial que en relación co tratamento de residuos e a reciclaxe realiza esta entidade, así como formarse nas boas práticas relacionadas co tratamento do lixo.
CONCIENCIACIÓN SOBRE O LIXO QUE XERAMOS
Un grupo de educadores de Sogama explicou ao grupo de escolares a necesidade de levar a cabo un consumo responsable, diminuindo a cantidade de lixo xerado día a día, e posibilitando a reutilización dos produtos o maior número de veces posible, e separando adecuadamente uns doutros cando termina o seu uso e se transforman en residuos, cada un no seu contedor específico.
VISITA GUIADA Á PLANTA DE CLASIFICACIÓN
Trala charla, os escolares, acompañados dos monitores e do profesorado acompañante, realizaron unha visita guiada polas distintas plantas que integran o complexo medioambiental, para observar os mecanismos de clasificación dos desperdicios recollidos nos contedores amarelos (envases de plástico, bricks e latas) e que na planta se seleccionan de xeito automático por tipoloxías, utilizando para isto lectores ópticos e outros dispositivos tecnolóxicos. Unha vez prensados e embalados son remitidos aos centros de reciclaxe. Respecto ao lixo convencional, recepcionado en dous grandes fosos, o grupo visitante comprobou o itinerario que segue desde a súa entrada nas instalacións de Sogama ata a súa saída, destinando á industria transformadora a parte susceptible de ser reciclada (é o caso do aceiro e o aluminio) e convertindo o resto en enerxía eléctrica. O complexo medioambiental de Sogama en Cerceda recibiu o ano pasado un total de 4.000 visitas de todo tipo de colectivos, e contabiliza máis de 52.000 visitantes dende a súa posta en marcha.
Cargando ...
