As obras de construcción na piscina de Sarria reiniciáronse a pasada semana, unha vez que se completaron os trámites administrativos. Así, o Concello presentou á Deputación de Lugo o proxecto definitivo da obra trala súa modificación, e os responsables de ambas administracións achegáronse ao emprazamento desta infraestrutura para coñecer o estado dos traballos.
Durante a súa visita, Gómez Besteiro destacou que esta actuación “contribúe a manter 50 empregos na construción, un dos sectores máis castigados pola crise e o paro, e dotamos ós veciños de Sarria e do resto da comarca dun servizo polo que levan esperando 20 anos”. O organismo provincial achegou 1,4 millóns de euros para a construción da piscina de Sarria a través do Plan Extraordinario de Obra Pública, o que supón o 80% do custe inicial da obra, mentres que o Concello investiu o 20% restante. Agora, a Deputación financiará tamén o 80% do sobrecuste das novas obras adicionais, que suman 307.000 euros e que consistirán na construción dun muro perimetral que evite as filtracións de auga na piscina. Pola súa parte, a voceira do PP na Deputación, Elena Candia, acusou ao anterior goberno municipal e ao goberno provincial de “faltar á verdade” en canto á cuestión da climatización desta piscina. Candia explicou que “a climatización das instalacións non está contemplada no proxecto de reformado da Deputación, que supón un custo de 300.000 euros e cuxas adecuacións finalizarían en 2011”. A voceira do PP dixo que “as obras da climatización suporían a maiores outros 500.000 euros, quedando evidenciado un dos cuantiosos despropósitos da execución da infraestrutura”. Neste senso, Besteiro lembrou que a Xunta “incumpriu a promesa electoral que realizou en varias ocasións de construír unha piscina climatizada en Sarria e agora falta o seu apoio para climatizar a instalación que financian Deputación e Concello, cando é a administración autonómica que ten as competencias en deportes.”
Cargando ...
