Monforte limpo: un logro de todos na busca dunha imaxe impecable

“Recoñecer o esforzo da cidadanía e mostrar o que facemos ó resto do Estado, para promocionar a imaxe de Monforte como cidade limpa e atractiva” foron os motivos que impulsaron ao Concello de Monforte, segundo explicou o seu alcalde, Severino Rodríguez, a presentar a candidatura da vila ao premio Escoba de Prata 2012. Este concurso de ámbito nacional, organizado pola asociación ATEGRUS dentro dunha iniciativa da Unión Europea, buscar premiar e difundir o bo facer no eido da xestión de residuos e do aseo urbanos, e tamén na elaboración de proxectos e desenvolvemento de tecnoloxías que permitan unha xestión sustentable do medio ambiente.

Esta iniciativa municipal busca que Monforte sexa “un exemplo de cidade limpa”. Arquivo EC.

AGRADECEMENTO Á COLABORACIÓN DA CIDADANÍA

En relación a esta iniciativa, Severino Rodríguez explicou que a decisión municipal de presentar a candidatura de Monforte de Lemos ao premio Escoba de Prata 2012 partía da aplicación do novo sistema de recollida de lixo, que trouxo como consecuencia “que a cidade está máis limpa, a cidadanía desenvolve mellores práticas medioambientais e rexístrase unha redución na cantidade dos chamados residuos impropios, polo que o Concello paga menos a Sogama”. O alcalde de Monforte agradeceu á cidadanía “a súa colaboración” e solicitou “que se continúe no mesmo camiño, xa que o obxectivo final é ser un exemplo de cidade limpa, para o que dispoñemos do material e dos recursos humanos necesarios”.

PROMOCIÓN DE MONFORTE NA FEIRA INTERNACIONAL DE URBANISMO EN MADRID

O rexedor local apuntou ademais que o feito de presentar a candidatura ao premio Escoba de Prata 2012 ofrece a posibilidade a Monforte de estar presente cun stand propio na Feira Internacional de Urbanismo e Medio Ambiente (TECMA 2012), que se celebrará en Madrid do 12 ao 15 de xuño. Severino Rodríguez destacou as posibilidades que esto supón para a difusión de Monforte de Lemos como unha cidade respectuosa co medio ambiente.

CONCURSO DE MAQUETAS DE RECICLAXE, E PREMIO AO BARRIO MÁIS LIMPO

Neste mesmo stand estará exposta a maqueta gañadora do concurso que convoca a Concellería de Medio Ambiente para os centros de ensino, así como o nome do barrio gañador no concurso do barrio máis limpo da cidade. Segundo informaron dende a Concellería de Medio Ambiente, o obxectivo do concurso para centros de ensino é promover a concienciación de recuperación dos residuos de selectiva entre os estudantes de Monforte, de xeito que as xeracións, tanto presentes como futuras, poidamos axudar a mellorar a nosa calidade de vida e sustentabilidade dentro da nosa cidade. Segundo se especifican nas bases da convocatoria, poderán participar no concurso de Medio Ambiente todos os estudantes de entre 10 e 16 anos e educación especial, de todos os centros de ensino do Concello de Monforte, cun límite dun traballo por centro. O traballo consistirá na elaboración dunha maqueta de calquera dos monumentos de Monforte, sendo requisito imprescindible que a maqueta se elabore usando como mínimo tres elementos de reciclaxe (latas, botellas, tetrabrik, papel ou cartón, bolsas, etc), e que as súas medidas non excedan de 1m x 1m x 1m. Cada traballo debe ir acompañado dun texto ou narración explicativa sobre o monumento representado, que deberá estar escrita en galego. Asimesmo, deberá acompañarse o traballo presentado dun título, unha mensaxe didáctica final a modo de lema ou slogan, e a relación dos materiais empregados na elaboración da maqueta. O 15 de maio será a data límite para presentar os traballos na Oficina de Medio Ambiente do Concello de Monforte. Todos os centros participantes recibirán un agasallo e poderán exhibir os seus traballos na Casa da Cultura. Ao centro gañador corresponderalle un premio en metálico de 600€, que deberá ser destinado a sufragar algunha actividade relacionada co medio ambiente.

Pola súa banda, o concurso de barrios valorará os horarios nos que se deposita o lixo nos cubos e contenedores, como se verten os residuos, a recollida selectiva e os excrementos animais. Este concurso desenvolverase durante o mes de maio, e cada semana publicarase a puntuación dos tres primeiros clasificados según o criterio da empresa FCC e a delegación municipal de Medio Ambiente.

MÁIS E MELLOR SELECCIÓN DE RESIDUOS EN ORIXE

O concelleiro de Servizos, Xosé Lois Rivera, informou de que o novo sistema de recollida de lixo (cubeo e illas selectivas) en Monforte fixo posible que a cidadanía realice unha mellor selección de lixo en orixe, o que favorece a reciclaxe (e, polo tanto, a diminución dos residuos impropios, reducindo así a contía da penalización por parte da empresa encargada da súa xestión). Así, no 2011 rexistrouse con respecto ao ano anterior un incremento do 18 % na recollida de papel e cartón, dun 8,3 % na recollida de vidro, e dun 12,6 % na recollida de roupa usada. Asimesmo, Rivera destacou a importancia do cubeo na diminución da cantidade de residuos urbanos de materia orgánica que se están a rexistrar debido a unha maior e mellor selección do lixo e ó incremento da frecuencia de utilización do Punto Limpo. As cifras derivadas deste feito falan dun aforro de 13.723,35 € na factura que o Concello ten que pagar a Sogama polos últimos meses do 2011. Para o ano 2012 o Concello estima o aforro en 26.000€, polo que dende o goberno municipal instan á cidadanía a continuar “na boa liña da reciclaxe”, tanto polo seu impacto medioambiental como polo aforro económico que supón.

Deixa unha resposta

Your email address will not be published.

Nova Anterior

Críticas pola eliminación da subvención autonómica á axuda no fogar

Seguinte Nova

O comercio de proximidade amplía os horizontes de venda

Últimas noticias sobre GALERÍA

     
A %d blogueros les gusta esto: