Asimesmo, a aposta do goberno municipal por unha marca de garantía para o aceite de Quiroga consigue o apoio do Parlamento galego
A singularidade xeolóxica e produtiva das terras quiroguesas están a recibir neste mes de maio un recoñecemento oficial que, aínda que merecido, non deixa de ser froito dun traballo constante e decidido por parte do grupo de goberno municipal. O 7 de maio de 2012 o Diario Oficial de Galicia publicaba o decreto da Consellería de Medio Ambiente, Territorio e Infraestruturas polo que se declara Monumento Natural o pregamento xeolóxico de Campodola-Leixazós. Este decreto sitúa a Quiroga no grupo dos oito monumentos naturais recoñecidos en Galicia, etiqueta que ten unha repercusión máis aló das nosas fronteiras, xa que é a Unión Europea a que garante en último termo a protección deste singular paraxe natural.
“FEITO EXTRAORDINARIO” PARA QUIROGA, E BLINDAXE PERPETUO PARA A PROTECCIÓN NATURAL DE CAMPODOLA
A repercusión desta declaración para o municipio foi calificada polo alcalde quirogués, Julio Álvarez, de “extraordinaria”. Como bo coñecedor deste longo proceso que agora culmina (xa que foi súa a idea de poñer en valor esta singularidade tectónica, “da que só hai exemplos similares en tres lugares do mundo”, apunta), Julio Álvarez declaraba a súa satisfacción porque Quiroga conte por fin entre os territorios naturalmente privilexiados e recoñecidos como tales tanto en Galicia como en Europa. Según explica o rexedor local, “o feito de acadar a “declaración de Monumento Natural” xa implica unha promoción de Quiroga, pero o máis importante é que con esta declaración, Campodola queda blindada para sempre como lugar singular e protexido, á marxe do discurrir político dos sucesivos gobernos”.
A AUTÉNTICA “PEL” DA TERRA TAL E COMO FOI HAI 300 MILLÓNS DE ANOS
O recoñecemento “nacional e internacional do importante valor xeolóxico deste escenario natural” queda recollido de xeito explícito no decreto da Consellería de Medio Ambiente. O pregamento xeolóxico de Campodola-Leixazós consérvase non só destaca pola súa “notoria singularidade, beleza e interese científico”, senón tamén porque, según recoñece o decreto oficial, se conserva praticamente intacto dende o Carbonífero inferior, isto é, aproximadamente dende hai 310 millóns de anos. Estes datos sitúan o pregamento de Campodola entre as máis particulares formacións xeolóxicas do mundo; resultado da deformación en forma de conca das capas do solo debido á acción continua e intensa dos movementos internos da terra, a erosión actuou de xeito que deixa á vista os antiquísimos estratos xeolóxicos que poucas veces poden percibirse. Algúns científicos xa sinalaron que o pregamento de Campodola non é só un dos puntos da xeoloxía estructural máis importantes de España, senón que se trata máis ben dun “espectáculo natural” que ten moi poucos puntos de comparación en todo o continente (só nos Alpes e nalgún punto dos Pirineos se atopa unha formación parecida).
QUIROGA, OS ÚNICOS GLACIARES DO NOROESTE PENINSULAR
A dimensión da importancia desta formación xeolóxica ía revelándose, según avanzaban os traballos de determinación desta área protexida, como unha auténtica singularidade. Según explica o alcalde de Quiroga, Julio Álvarez, “de seguida poidemos intuir que este pregamento ía ter o seu momento, a súa declaración oficial, o que podería atraer sen dúbida a un sector de poboación moi selectivo, vinculado ó mundo da natureza e do seu estudo científico (como xeólogos ou naturalistas), así que vimos a pertinencia de traballar na promoción turística deste tesouro, froito do cal é hoxe o Museo Xeolóxico de Quiroga”, comenta Álvarez. O seu entusiasmo polo que considera “o nacemento xeolóxico de Galicia e do continente no que nos tocou vivir” fixo posible levar a bo término todo un proceso técnico, científico, político e administrativo que se remonta a máis de dez anos atrás, aínda que o resultado só podía ser exitoso, “tendo en conta que Quiroga é o único territorio do noroeste español que ten glaciares, o que xa fala claramente da súa singularidade”.
REGULACIÓN PARA PROTEXER O ENCLAVE XEOLÓXICO E MAILA SÚA PAISAXE
Para preservar este entorno, o decreto de declaración de Monumento Natural establece unha serie de medidas para garantir non só a conservación dos valores que motivaron a súa declaración, senón tamén os usos tradicionais e recreativos da zona, que configuraron a paisaxe da contorna. Neste sentido, prohíbesen en todo o ámbito do monumento natural os campamentos, acampadas, actividades de alpinismo ou escalada; os desmontes e terrapléns, queimas, vertedoiros e verteduras de todo tipo; a colocación de anuncios publicitarios, construcción de calquer tipo de edificación e de infraestruturas que menoscaben a calidade paisaxística do contorno, e os aproveitamentos mineiros. En canto á circulación de vehículos, fóra dos camiños e vías existentes, só se permitirá o estacionamento e circulación de vehículos e maquinaria vinculados á actividade agrícola e forestal da zona. Estas medidas de protección abranguen á totalidade da superficie declarada Monumento Natural, 90 hectáreas pertencentes ás comunidades de montes veciñais de man común de Campodola (75 hectáreas) e Leixazós ( as 15 restantes). O cumprimento desta normativa referida á conservación da natureza correspóndelle á Consellería de Medio Ambiente, Territorio e Infraestruturas, encargada de vixiar polo cumplimento das normas de protección, e das sancións polas infraccións nas que se incurra. Asimesmo, a aprobación desta declaración de Monumento Natural trae aparellado un investimento económico para a elaboración do plan de conservación do monumento natural de 30.000 euros, cofinanciados cos fondos europeos Feder nun 70%, proxecto que se ha de renovar e presupostar de novo cada dous anos a partir da súa aprobación.
O “OURO LÍQUIDO” DE QUIROGA, A UN PASO DA MARCA DE GARANTÍA
A posta en valor da riqueza paisaxística e produtiva de Quiroga acadou este mes un novo espaldarazo. O Parlamento galego aprobaba por unanimidade unha proposición do grupo parlamentario popular, impulsada conxuntamente co Concello de Quiroga, para que a Xunta de Galicia facilite a tramitación dunha “marca de garantía” (de tramitación moito máis sinxela e rápida que as denominacións de orixe ou as indicacións xeográficas protexidas) para o aceite de Quiroga. Este “segundo fito na historia do territorio de Quiroga”, según Julio Álvarez, permitirá amparar a potencialidade da produción do aceite de Quiroga, ao tempo que se apoia a súa promoción e divulgación para a súa comercialización. Esta marca de garantía pretende evitar a utilización fraudulenta do nome e da orixe deste produto galego, dando seguridade xurídica ao consumidor, respaldando a produción e apostando pola potencialidade dun produto que está a ver crecer a súa demanda no mercado e entre os consumidores “de aceite de calidade”.
