Viño e gastronomía en Monforte: rexurdimento da potencialidade tradicional da Ribeira Sacra

Celebradas en Monforte as Xornadas Enoturísticas-Culturais na Ribeira Sacra

A iniciativa pon de relieve o atractivo turístico da enogastronomía nesta zona

Un momento da presentación das Xornadas Enoturísticas-Culturais na Ribeira Sacra, coa intervención de Antonio Veiga, vicepresidente da Deputación de Lugo; Severino Rodríguez, alcalde de Monforte; Manuel Vázquez, xerente da Rede Galega de Empresas, e os representantes da Asociación Galega de Viticultura e da Denominación de Orixe Ribeira Sacra. GPVDL.

O Centro do Viño da Ribeira Sacra en Monforte acolleu boa parte das actividades que ó longo dos días 11, 12 e 13 de maio desenvolvéronse en varios puntos da provincia de Lugo en torno ás posibilidades do enoturismo e a gastronomía.

IMPULSO AO SECTOR PRODUTIVO E DE SERVIZOS VINCULADO AO VIÑO, O QUEIXO E O TURISMO INTERIOR

As Xornadas Enoturísticas-Culturais na Ribeira Sacra buscaban concienciar sobre a importancia das sinerxias entre os nosos sectores produtivos alimentarios e os establecementos hostaleiros, para propiciar o consumo do produtos galegos entre toda a poboación. Conferencias, visitas a viñedos, catas gastronómicas e charlas con profesionais do viño, turismo e da gastronomía lucenses integraron un programa destinado a impulsar os sectores tanto produtivos como de servizos vinculados á viticultura, produción de queixo, hostaleiría e turismo interior da provincia de Lugo. A organización das Xornadas Enoturísticas-Culturais na Ribeira Sacra correu a cargo da Rede Galega de Empresas e da Asociación Galega de Viticultura-FRUGA, co patrocinio da área de Cultura da Vicepresidencia primeira da Deputación de Lugo, e a colaboración dos Concellos de Lugo, A Pobra do Brollón, e Monforte de Lemos, a Asociación Provincial de Empresarios de Hostelería de Lugo (APEHL), a Denominación de Orixe Ribeira Sacra, e as Denominacións de Orixe Protexidas Arzúa-Ulloa e San Simón da Costa.

CREACIÓN DE EMPREGO E DEFINICIÓN DE SINERXÍAS ENTRE SECTORES

Durante a presentación destas Xornadas, o vicepresidente primeiro da Deputación de Lugo, Antonio Veiga, lembrou que o obxectivo do organismo provincial pasa pola creación de emprego a través do turismo, que na Ribeira Sacra está moi vinculado ao viño e á gastronomía, “o que permite vincular esta estratexia co sector primario, a través do viño e do queixo”. Veiga definiu estas Xornadas como “un foro aberto que vai permitir que os sectores público e privado definan estratexias, o que coincide co plantexamento da Deputación recollido na Empresa Provincial de Turismo, que se vai a constituír definitivamente no pleno deste mes”. Pola súa parte, o alcalde de Monforte, Severino Rodríguez, considerou “axeitado” o plantexamento das Xornadas e a vinculación dos diferentes sectores “para poñelos en valor e dinamizar a economía”. O Alcalde destacou que “difundir os produtos da terra é difundir o territorio e os seus atractivos”. Manuel Vázquez, en representación da Rede Galega de Empresas, coorganizadora das Xornadas, destacou o papel desta iniciativa para a promoción das empresas, coa intención “de crear sinerxias entre o viño, o queixo e o turismo para que a economía avance”.

VISITAS A ADEGAS E REFLEXIÓN SOBRE VIÑO E PAISAXE

As Xornadas iniciáronse o venres 11 de maio no Centro do Viño da Ribeira Sacra, coas conferencias tituladas “O Centro do Viño e a potenciación dos recursos enoturísticos”, impartida por Rosario Chao Quintana, redactora do proxecto Centro do Viño da Ribeira Sacra; e “Paseo pola Ribeira e o Val de Lemos”, a cargo do escritor Lois Diéguez Vázquez. Os participantes nas xornadas poideron disfrutar dunha visita a Adegas Moure, no Saviñao, para rematar o día cunha cea en Adega Algueira, en Sober.

HISTORIA DOS VIÑEDOS DA RIBEIRA SACRA, COMERCIALIZACIÓN INTERNACIONAL DO NOSO VIÑO E TESTEMUÑAS EMPRESARIAIS DO SECTOR DO QUEIXO

A mañá do sábado 12 de maio estivo adicada á visita a viñedos en Chantada, Amandi e Vilachá, coa guía explicativa a cardo dos expertos Roberto Regal e Francisco Rego Martínez. Xa pola tarde, o Salón Deputación do Museo de Lugo acolleu unha conferencia sobre a comercialización na que participaron o adegueiro Pepe Rodríguez; Cheché Real, presidente da Asociación Provincial de Empresarios de Hostalería en Lugo; Adrián Gómez, xestor de internacionalización; Modesto Toubes, propietario da queixería Casleiras; e Luís Carrera Valín, artesán da granxa Arqueixal. A xornada continuou con dúas conferencias, “A historia dos viñedos da Ribeira Sacra no contexto da viticultura galega”, a cargo de Pegerto Saavedra, catedrático de Historia Moderna na USC, e “A actual situación do sector vitivinícola e queixeiro na provincia de Lugo”, impartida por Xosé Mouriño Cuba, xefe do Servizo de Industria e Calidade Agroalimentaria da provincia de Lugo. Unha cata de viños e unha degustación de queixos na Praza da Soedade serviu de colofón para esta xornada de traballo. A despedida destas Xornadas Enoturísticas-Culturais o domingo día 13 tivo un carácter eminentemente lúdico, co participación nun túnel do viño e unha degustación de queixos antes da clausura oficial.

Deixa unha resposta

Your email address will not be published.

Nova Anterior

Sober continúa coas actividades de reciclaxe

Seguinte Nova

Expropiación dos terreos para a nova potabilizadora de Monforte

Últimas noticias sobre ASOCIACIONISMO

A %d blogueros les gusta esto: