O novo proxecto museográfico supón a redefinición dos espazos contiguos ó Pazo e a recuperación e restauración de pezas diversas
O pasado 18 de maio, Día dos Museos, foi a ocasión que os responsables da Rede Museística Provincial de Lugo aproveitaron para dar a coñecer os novos espazos expositivos habilitados no Museo Pazo de Tor de Monforte. O delegado da Área de Cultura e Turismo da Vicepresidencia primeira da Deputación, Mario Outeiro, e a xerente da Rede Museística Provincial, Encarna Lago, percorreron as novas instalacións xunto a un grupo de visitantes e algúns dos participantes no obradoiro de fotografía para persoas cegas que se está a impartir nesa mesma sede cultural. O responsable provincial de Cultura destacou na súa intervención que “sempre é unha gran noticia poder poñer a disposición da cidadanía novos espazos culturais, polo que todos nos debemos congratular”.
A ANTIGA PALLEIRA ACOLLERÁ A BIBLIOTECA, E AS PEZAS DE GUARNICIONERÍA, FORXA E COCHES DE CABALOS PODERÁN VERSE NAS SÚAS DEPENDENCIAS ORIXINAIS
Os responsables do novo proxecto museístico de Tor explicaron que a remodelación das dependencias contiguas ó pazo remóntanse ó ano 1999. As intervencións sobre as estancias adicadas a albergar os coches de cabalos, animais de tiro e pezas de montar respetaron os paramentos orixinais da construción, do século XVIII, renovaron cubertas e chans e adaptaron os elementos orixinais do edificio para acadar un espazo “moderno e adaptado” ás necesidades museísticas. En canto á distribución dos espazos, as dúas primeiras dependencias do lado esquerdo amosan os elementos vinculados á cabalería, coa colección de guarnicionería e coches de cabalos. A continuación, sitúanse os espazos adicados á forxa e á ambientación do poleiro; para rematar cunha sala reservada á didáctica e outra, a antiga palleira, acolle a biblioteca.
RESTAURACIÓN DE COCHES DE CABALOS, MAPAS E INSTRUMENTOS MUSICAIS, ENTRE OUTROS
Segundo explicaron os responsables da musealización destes novos espazos, o “esforzo orzamentario” por parte da Vicepresidencia da Deputación no só se destinou ó acondicionamento das estancias, senón tamén á recuperación e restauración de diversas pezas, que non estiveron suxeitas á unha conservación e limpeza adecuadas durante décadas, e amosaban un alto grado de deterioro. Entre as pezas que foron intervidas para a súa recuperación como fondo expositivo atópanse elementos pertencentes ás coleccións de guarnicionería, cadeiras e coches de cabalos, e tamén pezas bibliográficas, como documentos do arquivo, mapas, planos, e incluso instrumentos musicais.
O PAZO DE TOR, LUGAR DE DINAMIZACIÓN E ENCONTRO CULTURAL
O Museo Pazo de Tor está a exercer unha función cultural máis aló do concepto expositivo. A realización de actividades para escolares, ciclos de cine, xornadas divulgativas e obradoiros para colectivos específicos (infancia, persoas con discapacidade, etc) promovidos dende a Rede Museística Provincial tentan de aproveitar as recuperadas instalacións tradicionais para a dinamización e o encontro culturais. Recentemente, tivo lugar a presentación do primeiro número da revista oral “A voz dos lemavos”, iniciativa de carácter anual promovida polo Museo Pazo de Tor dentro da Rede Museística. Baixo a coordinación de Antonio Reigosa, congregou o 26 de maio a diversos creadores e investigadores do sur de Lugo, como o músico Antón Valcarce, o arqueólogo Iván Álvarez, a poeta Olga Novo, e o grupo do obradoiro de teatro do CEIP A Gándara, dirixido pola dramaturga Eva F. Ferreira.
TOR, NA GUÍA DE CASAS SINGULARES
Asimesmo, a posta en valor da riqueza monumental do antigo Pazo de Tor repercute na conservación patrimonial do rural galego, e no seu recoñecemento exterior. O pasado mes de abril, a Fundación de Casas Históricas e Singulares, institución non lucrativa de ámbito estatal, incluíu na súa Guía de Casas Museo ó Pazo de Tor e ó Museo Etnográfico de San Paio de Narla, en Friol, tamén integrado na Rede Museística Provincial de Lugo. Esta guía, editada en español e inglés en formato impreso e dixital, abrangue máis dun cento de casas singulares espalladas por toda a Península Ibérica.
Cargando ...
