A Asociación Veciñal do Saviñao dirixiu un escrito ó Concello para transmitir “a preocupación dos veciños polo deterioro das estradas e de certos camiños veciñais por onde se está a sacar a derivación eléctrica” de media tensión da planta solar de Seteventos. No escrito, a Asociación precisa que, aínda que a instalación vai soterrada, “ocasionou a desaparición de boa parte da banda de rodadura da estrada entre o cementerio da Portela e A Touza na parroquia de Piñeiró , así como a desfeita de paredes e balados de propiedade particular e deterioro dalgúns camiños”.
INCIDENCIA DAS OBRAS NOS VIAIS DE ACCESO
A Asociación Veciñal do Saviñao denunciou asimesmo que “tamén están intransitables e descarnados os viais de acceso a Mosiños dende a estrada de Monforte e deiquí ata Seteventos, así como a estrada entre Seteventos e Abuíme, desfeitas dende o inicio das obras do parque solar, fai xa tres anos”. Os representantes veciñais solicitan que o Concello aclare a quen lle corresponde “asumir a reparación das As infraestructuras deterioradas, si será a empresa responsable, Solidaridad Solar, ou ben si será o Concello quen asumirá a reposición dos viais tal e como estaban denantes de ditas obras”. Dende a Asociación Veciñal do Saviñao estiman que “o feito de que esta empresa sexa declarada de Interese Municipal non exime da reparación e acondicionamento das infraestructuras deterioradas na súa implantación”
ELIMINACIÓN DAS BARREIRAS ARQUITECTÓNICAS
Asimesmo, a Asociación Veciñal do Saviñao criticou que un dos obxectivos das obras de acondicionamento do espazo perimetral do edificio do Concello, a eliminación das barreiras arquitectónicas, “non está totalmente solucionado”. Sinalan que un dos camiños da área axardinada diante do Concello “aínda permanece pechado cun bordillo adoquinado, provocando acumulación de augas e limitando un dos accesos peatonais máis céntricos”, o que corresponde ó que parte da esquina do panel informativo, o roble e a fonte. Asimesmo, os responsables deste colectivo califican de “erro” a colocación da balaustrada de pedra no acceso á Devesa, “xa que un espazo arbolado xa de por si está perfectamente delimitado”. A balaustrada “chega a anular os accesos escalonados á Devesa”, polo que solicitan a apertura destes accesos “aínda que se deixe o resto da balaustrada”.
Cargando ...
