A Feira Outrora: unha década homenaxeando o espíritu das feiras e dos oficios tradicionais

Artesáns que manteñen oficios tradicionais, como o de afiador, realizarán demostracións na mañá do día da Feira Outrora, o vindeiro 14 de xullo, en Rubián (Bóveda). Arquivo EC.

Xa está todo listo en Rubián para a celebración, o vindeiro 14 de xullo, da décima edición da Feira Outrora. Esta cita festiva estase a consagrar como un evento dos máis atractivos da provincia, ó conxugar o elemento lúdico para nenos e grandes coa recreación ó espíritu das antigas feiras, elemento inseparable das terras de Lemos.

RECUPERACIÓN DAS ANTIGAS FEIRAS

Hai dez anos que a Feira Outrora arrincou co obxectivo de recuperar o significado do antigo mercado tradicional de finais do século XIX e comezos do XX, como un xeito de actualizar e manter vivas tradicións populares e locais. A feira apareceu como un dos elementos máis recurrentes nos recordos e nas experiencias dos nosos maiores, que lembraban a ledicia daqueles días de feira onde a vida cotiá rompía o seu ritmo xordo de traballos e rutinas, e os doces, xarros, ferramentas e tecidos traídos por artesáns e comerciantes dende diversos puntos do entorno ofrecía unha oportunidade única de achegarse ó mundo de fóra. A evolución dos tempos foi quitándolle a aquelas feiras o seu carácter novidoso e festivo, e se cadra aínda comercial, polo que o seu pulo foi esmorecendo. Velaí o sentido da Feira Outrora: recuperar aquela dinamización tan singular do noso pobo e así, poder viaxar no tempo para descubrir os oficios antergos, as labores tradicionais. E todo isto, nun ambiente festivo para todos os públicos.

OS OFICIOS E A MALLA

A Feira Outrora incluía nos primeiros anos un mercado de exposición e venta de maquinaria agrícola, e pouco a pouco, e de xeito paralelo, foise afianzando unha mostra de artesanía que rematou protagonizando boa parte do evento. Dende as primeiras edicións, cando participaban unha vintena de artesáns, o número e a demanda de expositores foi medrando ata acadar os 45 postos da última edición, xa que incluso acuden artesáns de fóra de Galicia. Afiador, zoqueiro, oleiro, cesteiro, panadeiro, vidreiro, ferreiro, e outros máis son os mestres artesáns que se poden ver traballando durante a xornada festiva. Asimesmo, Outrora incorpora dende o ano 2008 a recreación dunha “malla”, unha das escasísimas representacións desta actividade tradicional que se realizan agora en Galicia.

PROGRAMA DE ACTOS

A primeira hora da mañá do 14 de xullo terá lugar a inauguración da I Mostra de Etnografía de Rubián, para dar comezo á representación dos oficios tradicionais. Música a cargo da Banda Municipal de Gaitas de Bóveda, e teatro de rúa con obradoiros para nenos e adultos ocuparán a última parte da mañá, trala degustación de produtos tradicionais. As actividades para os máis novos voltan pola tarde, con obradoiros e a Festa da Auga e da Espuma. A media tarde terá lugar o concerto de música de cámara na Capela do Ecce Homo, para dar paso ás oito e media á recreación etnográfica da Malla. A festa pecharase cos pasodobles a partir das nove e media da tarde.

Deixa unha resposta

Your email address will not be published.

Nova Anterior

Constituirase unha asociación para mellorar a Feira Medieval de Monforte

Seguinte Nova

O 15 de xullo celebrarase en San Clodio a seguinte proba puntuable do Circuíto Leader Ribeira Sacra de Carreiras Populares 2012

Últimas noticias sobre CULTURA

 
A %d blogueros les gusta esto: