16 medallas dunha tacada é o premio ó traballo e ó esforzo deste grupo de 11 medallistas pertencentes ó Club Natación Monforte. Logo dun ano de intensa dedicación e con moita ilusión, este grupo de rapaces e rapazas acudiron ó Campionato Galego de categoría alevín, e volveron a Monforte cun éxito extraordinario.
GRAN ADICACIÓN DOS RAPACES E EXCELENTE TRABALLO DO ENTRENADOR
“Dende que son directivo deste club, nunca chegara a un campionato galego un número tan alto de nadadores”, destaca José Manuel Martínez, directivo do Club Natación Monforte, que explica estes excelentes resultados “grazas á dedicación dos rapaces e ó traballo de Pablo Diéguez, o noso entrenador, que fixo posible que chegaran tantos nadadores á competición galega dentro dunha mesma categoría”.
16 MEDALLAS NUN CAMPIONATO ONDE SE BATERON 6 RECORDS GALEGOS
A alegría de meter un gran número de nadadores no Campionato Galego viuse culminada pola consecución desta inusual cifra de medallas. “Acadar 16 medallas competindo a nivel galego é algo moi importante”, sinala Martínez, “xa que o nivel e o grao de competitividade é moi alto”. O logro dos nadadores do Club Natación Monforte resulta todavía máis significativo “se se ten en conta o altísitmo nivel do Campionato neste ano, onde se batiron nada menos que 6 records galegos, e de 24 equipos participantes o noso Club quedou en 4ª posición”, comenta con satisfacción Martínez. Os nadadores que conseguiron medalla no Campionato Galego Alevín foron Uxía García Rodríguez (Ouro en 400 Libres e Ouro en 200 Libres), Sandra Suñer Díaz (Prata en 400 Libres e Bronce en 400 Estilos), Pablo Valcarce Domínguez (Ouro en 100 Costas, Prata en 400 Libres e Ouro en 400 Estilos), Iago Casar Cocheteux (Ouro en 100 Braza, Ouro en 200 Estilos e Prata en 400 Estilos), Patricia González Blanco (Prata en 200 Estilos), Brenda Martínez Pulido (Bronce en 200 Mariposa), Relevo Feminino 4×200 Libres (Bronce), Aldara Pozo Rodríguez (Bronce en 800 Libres), Relevo Feminino 4×100 Libres (Bronce), Relevo Femenino 400×100 Estilos (Prata).
PRÓXIMAS CITAS: CAMPIONATO DE ESPAÑA EN CÁDIZ, E CAMPIONATO GALEGO INFANTIL EN OURENSE
Este bo facer culminará dentro duns días, cando cinco dos nadadores que acudiron á proba galega participen no Campionato de España, que se celebrará en Cádiz do 6 ó 8 de xullo. Participarán nesta proba nacional Uxía García Rodríguez, Sandra Suñer Díaz, Pablo Valcarce Domínguez, Iago Casar Cocheteux e Patricia González Blanco. Asimesmo, o nadador Javier Martínez Argiz competirá o 7 e 8 de xullo no Campionato Galego Infantil en Ourense.
BOA CANTEIRA QUE ESTÁ A CREAR ESCOLA NA COMARCA DE LEMOS
En canto á repercusión destes logros deportivos, Martínez sinala con satisfación que ó feito de conseguir medallas e competir a alto nivel “atrae á xente ó Clube”. No Club Natación Monforte contan con seccións de benxamín, alevín e infantil, e tamén de masters, os veteranos, e o número de socios ronda o medio centenar. “A verdade é que entusiasmo e esforzo non nos faltan”, sinala Martínez, “aínda que non viría mal contar con algo máis de diñeiro no Club, porque a verdade é que estamos a lograr uns resultados extraordinarios”. O brillo das medallas percíbese ben dende fóra e isto contribúe ó fortalecemento do Clube. “Dende o ano pasado estamos a funcionar cun acordo coa xestora da piscina municipal, e dende alí estannos a chegar moitas solicitudes de pais e nais que se interesan por incluir ós seus fillos no noso Club”, comenta Martínez. O directivo do Club Natación Monforte explica que “loxicamente, unha cousa é nadar ben e outra competir, polo que estamos a establecer un curso previo para aqueles rapaces e rapazas interesados e, se vemos que hai avances, ir incluindo ós nadadores na disciplina do Club”.
