Lugo acolleu a presentación do Programa EMEGA ás asociacións de mulleres e empresarias da provincia. Durante o acto, a secretaria xeral da Igualdade, Susana López Abella, puxo de relevo o carácter estratéxico para a economía de Galicia de “desenvolver políticas públicas que creen as condicións axeitadas e favorezan as iniciativas empresariais lideradas por mulleres”. López Abella destacou que, segundo indican informes do Banco Mundial da Muller, as empresas lideradas por mulleres sortean mellor a crise e duran un 30 % máis que as creadas por homes.
AXUDAS ESPECÍFICAS PARA AS DIVERSAS FASES DO EMPRENDEMENTO
O programa Emega de fomento ao emprendemento feminino conta cunha dotación económica para este exercicio de 665.000 euros, con axudas estruturadas en catro tipoloxías: Emprende, Innova, Activa e Concilia. A liña Emprende está pensada para estimular a posta en marcha de iniciativas empresariais e a creación de emprego feminino por conta propia e allea. Pola súa parte, a liña Innova pretende promover a realización de melloras innovadoras nas empresas lideradas por mulleres que conleven a creación de emprego feminino. Asimesmo, a liña de axudas denominada Activa trata de favorecer a reactivación e consolidación de empresas mediante a renovación, relanzamento, ampliación ou cambio de localización da actividade.
AXUDAS PARA CONCILIACIÓN DE TRABALLO E FAMILIA
Como novidade deste ano, a liña Concilia está dirixida ás empresas nas que mediante acordos, convenios ou contratos de teletraballo, se implementen novos sistemas de organización que conleven flexibilidade no uso dos tempos, e ás empresas perceptoras das liñas Emprende, Innova ou Activa nas que haxa promotoras con fillos ou fillas menores de tres anos, ao obxecto de favorecer o exercicio profesional coa maternidade en idades temperás.
O EMEGA EN CIFRAS
O programa Emega permitiu a creación de 2.714 novos proxectos empresariais liderados por mulleres, desde a súa posta en marcha no ano 1996. Na convocatoria de 2011, o Emega subvencionou 82 proxectos, deles 38 na provincia de Pontevedra, 29 na de Coruña, 12 na de Ourense e 3 na de Lugo. En canto ó perfil das emprendedoras galegas, case a metade teñen estudos universitarios e frecuentemente tamén formación en emprendemento. Asimesmo, as mulleres amosan mellor disposición a percibir oportunidades para emprender, cun 38% sobre o 26% para os varóns, e teñen maiores expectativas de creación de emprego e un menor temor ao fracaso, un 20% fronte ao 31% dos homes.
Cargando ...
