A igrexa de San Vicente do Pino de Monforte de Lemos recuperará en breve o seu conxunto artístico coa recolocación dos retablos de San Bieito e o Santo Cristo que foran retirados para proceder a realizar obras de restauración no templo.
REMATE DO PROCESO DE RESTAURACIÓN
Segundo comunicou Raquel Arias, “en menos de dous meses recuperará todo o seu esplendor un dos principais expoñentes do patrimonio monumental do sur da provincia”. Con esta actuación finalizará o proceso de intervención no templo desenvolvido pola Consellería de Cultura, que restaurou a cabeceira da igrexa e o cruceiro así como os retablos (que presentaban problemas de humidade), por un importe global de 340.990 euros. A recolocación dos devanditos retablos como estruturas autoportantes estables (cos mínimos anclaxes aos muros), e a realización de dúas mesas de altar novas, suporá un investimento de 12.862 euros.
POSTA EN VALOR DA CULTURA E REPERCUSIÓN NO TURISMO
Con respecto a este proceso, a delegada territorial da Xunta en Lugo suliñou que “a restauración e conservación do noso patrimonio arquitectónico e monumental é unha prioridade para a Consellería de Cultura, pola posta en valor dos seus valores culturais e históricos e porque, ademais, convértese nun recurso turístico de primeiro orde”.
