O pasado 19 de xuño Severino Rodríguez mantivo unha reunión coa Conselleira de Sanidade, Rocío Mosquera, para falar sobre o futuro da Área Sanitaria de Monforte e sobre os servizos e investimentos vinculados ó Hospital Comarcal. Segundo manifestou o rexedor local trala reunión, a titular de Sanidade explicou que sobre a continuidade da Área Sanitaria de Monforte aínda non hai unha decisión firme. Rocío Mosquera indicou que están a avaliar os resultados obtidos nas áreas onde se ten aplicado o novo decreto e, unha vez rematada dita valoración e según os datos obtidos, nos vindeiros meses tomarase unha decisión sobre a Área de Monforte.
NON HABERÁ UCI POLA CRISE ECONÓMICA
En canto ós investimentos previstos para o Hospital Comarcal, a titular de Sanidade explicou ó Alcalde que a dotación do mamógrafo dixital está en fase de concurso, xunto con outros cinco para outros hospitais galegos, e se espera que poida estar operativo en Monforte antes de final de ano. Por outra banda, a conselleira de Sanidade transmitiulle ó rexedor monfortino que non será posible pór en marcha a UCI do Hospital Comarcal dada a actual situación económica.
SOBRE AS REFORMAS DO EDIFICIO DO HOSPITAL
Outro dos asuntos que abordou Severino Rodríguez na reunión con Rocío Mosquera foi o compromiso de financiar con 400.000 euros diversas reformas que afectan á estrutura do edificio hospitalario. Segundo anunciou o rexedor local, a titular de Sanidade manifestou que ninguén lle transmitira ese compromiso nin a necesidade das reformas, brindándose a estudar a súa realización en caso de ser necesarias. En canto ós servizos, Rocío Mosquera manifestou a Severino Rodríguez o seu convencemento de que o Hospital Comarcal de Monforte “funciona ben” e o seu “compromiso coa mellora dos servizos que presta”.
“CORDIAL” REUNIÓN QUE NON DISIPA AS DUDAS SOBRE O FUTURO DA ÁREA SANITARIA
O Alcalde de Monforte cualificou de “cordial” a reunión coa Conselleira e que serviu “para avanzar algunhas melloras do Hospital Comarcal”, aínda que expresou a súa “preocupación” sobre o futuro do mantemento da Área Sanitaria. Severino Rodríguez lamentou asimesmo a “rotunda negativa” da titular de Sanidade á posta en marcha da UCI do Hospital monfortino.
