70 bolsas de emprego en Europa para titulados lucenses dentro do Plan de formación europeo Leonardo da Vinci

Gómez Besteiro presentou as novas becas, acompañado de Andrea Campillo e Wenceslao Posada, dous dos beneficiarios das primeiras becas medioambientais Lug02, que falaron da súa experiencia formativa en Europa. GPDL.

Nestes días presentáronse as becas que a Deputación de Lugo impulsa a través do Programa de Formación Leonardo da Vinci, cun orzamento de 309.000 euros (financiados nun 70% con fondos europeos) para que 70 beneficiarios lucenses con titulación universitaria ou titulados na EIS de Lugo poidan facer práticas en empresas de Alemaña, Austria, Italia, Portugal, República Checa e Reino Unido durante tres meses. “É necesario impulsar iniciativas que favorezan a inserción laboral dos máis novos, porque son un dos sectores máis castigados polo paro, sobre todo en Lugo, onde un 21% dos desempregados rexistrados en xuño son menores de 30 anos”, suliñou o presidente provincial durante a presentación das becas.

BOLSAS PARA UNIVERSITARIOS

Estas 70 bolsas, a custe cero, repártense baixo dúas categorías; por un lado, as Lugojob, solicitadas pola Deputación, ofertan 50 prazas dirixidas a lucenses menores de 35 anos cunha titulación universitaria acadada nos últimos catro anos e que estén desempregados. A titulación deberá estar relacionada co medio ambiente, agroalimentación, gandeiría, pesca, informática, turismo e ciencias da vida. As práticas realizaranse durante 3 meses e medio en empresas de Hamburgo, Viena, Florencia, Lisboa, Praga, Belfast e Cork.

BOLSAS A TITULADOS POLA EIS DE LUGO

Pola súa parte, as 20 bolsas Ticlugo, xestionadas pola Fundación TIC, destínanse ós titulados da Escola de Imaxe e Son de Lugo. Son as primeiras becas que oferta a TIC no estranxeiro, e para optar a elas os solicitantes deben ter rematado nos últimos tres anos os estudos de Produción ou Realización de Radio, Audiovisuais e Espectáculos na Escola de Imaxe e Son. A formación será de tres meses en empresas de Belfast, Modena e Lisboa.

EN SETEMBRO ÁBRESE O PRAZO DE INSCRIPCIÓN

A información sobre o Programa de Formación Leonardo da Vinci pode atoparse na web www.deputacionlugo.org, onde se explican todos os detalles e se ofrecen os números de teléfono e e-mails para realizar as consultas oportunas. En setembro publicaranse as bases de selección e, inmediatamente, abrirase o prazo para inscribirse. No mes de outubro desenvolverase o proceso de selección e publicarase a lista de admitidos e excluidos na web da Deputación de Lugo. Xa en novembro, tramitarase a documentación para que os seleccionados poidan partir en xaneiro ó destino, onde permanecerán ata finais de maio ou principios de xuño. Aprendizaxe de idiomas, adquirir outra cultura laboral e “seguridade persoal cara ó traballo”, experiencia “valiosísima” para o currículo son algunhas das reflexións de Andrea Campillo e Wenceslao Posada, bolseiros en Alemaña na primeira edición das becas Lug02, que valoran asimesmo o feito de que as becas “alivian o risco económico para os mozos que queren formarse fóra”.

Deixa unha resposta

Your email address will not be published.

Nova Anterior

NOITES DE LECER PARA MOCIDADE E PÚBLICO INFANTIL EN MONFORTE

Seguinte Nova

A Xunta decreta a prohibición de queimas ata o 30 de setembro

Últimas noticias sobre CULTURA

A %d blogueros les gusta esto: