Vivir o Museo: un verán descubrindo Tor

O programa de actividades de verán da Rede Museística de Lugo está deseñado en torno ó funcionamento dos museos, e leva ós participantes nunha viaxe dende a creación da obra artística ata a súa exposición ó público

O delegado de Cultura da Deputación de Lugo, Mario Outeiro, presentou o programa de actividades do verán para cada unha das sedes da Rede Museística Provincial. GPDL

Interactividade e participación para coñecer os museos e, deste xeito, tamén a riqueza patrimonial e cultural da provincia son os puntais das actividades de verán programadas pola Rede Museística Provincial de Lugo. Segundo explicou o delegado de Cultura da Deputación de Lugo, Mario Outeiro, esta programación inclúe unha “completa e atractiva” oferta de actividades que se desenvolverán nos catro museos da Rede de xeito interactivo, é dicir, con visitas dos grupos participantes dun museo a outro, aínda que tamén se complementa con actividades específicas en dúas das catro sedes.

“ENRÉDATE NA REDE”, UNHA PORTA ABERTA Ó MUNDO DOS MUSEOS

Esta actividade terá lugar nos catro museos da Rede provincial, entre os que se ínclue o Museo de Tor, en Monforte de Lemos. O obradoiro “Enrédate na Rede”, dirixido a rapaces e rapazas de 4 a 15 anos, é unha actividade única desenvolvida en varias sesións, que en Tor se celebrarán o 31 de xullo e o 1 de agosto. O obxectivo de “Enrédate na rede” pretende dar unha visión global do museo e do proceso artístico en todas as súas fases, dende a realización das obras ata a súa exposición nos museos, pasando pola difusión dos traballos realizados. Para comezar con bo pé, a actividade empeza cunha visita de iniciación para o coñecemento básico do Museo.

Así, o 31 de xullo a actividade centrarase nas artes decorativas, a etnografía e a fotografía, relacionadas co Museo de Tor e co seu entorno. O día 1 de agosto, o grupo de participantes viaxará ata o Museo Provincial de Lugo para compartir a xornada cos rapaces que están a realizar esta mesma actividade en dito museo.

VIAXE A TRAVÉS DO TEMPO

A segunda das actividades da programación da Rede Museística Provincial en Tor xira ó redor da viaxe no tempo. Así, os participantes realizarán, do 22 ó 24 de agosto, unha experiencia prática consistente nunha escavación arqueolóxica.

Asimesmo, o 21 de agosto o grupo viaxará ó Museo Etnográfico de San Paio de Narla, en Friol, para compartir a xornada cos participantes na programación de verán deste Museo. A actividade deste día desenvolverase en torno á caracterización de época para a realización de diversos xogos competitivos por equipos, e baseados nos pasatempos medievais.

HORARIOS E INSCRIPCIÓN NAS ACTIVIDADES DE TOR

Estas actividades desenvolveranse de 11 a 14 horas, e o programa ofrece 40 prazas para os participantes nas dúas actividades que se celebrarán en Tor. As saídas e a realización de fotografías e vídeos que rexistran o desenvolvemento da actividade e que logo se colgarán nas canles dixitais da Rede Museística Provincial deben contar coa autorización escrita dos pais e nais dos participantes. As inscripcións poden realizarse no Pazo de Tor, e o formulario pode obterse no enlace http://www.museolugo.org.

MUSEOS COMO ELEMENTO DE ATRACCIÓN TURÍSTICA NA PROVINCIA

Na presentación do programa de verán da Rede de Museos, o responsable provincial de Cultura sinalou que “se está a traballar para que os museos da Rede sexan modernos, dinámicos, estean ao servizo do cidadán e teñan unha programación atractiva na que se mesture educación, cultura e diversión”, ao tempo que suliñou o crecemento do turismo cultural nos últimos anos. Outeiro expresou a necesidade de “facer máis accesibles os Museos á cidadanía”, polo que anunciou que este verán os museos da Rede Provincial abrirán de 9 da mañá a 9 da noite de luns a venres, os sábados de 10,30 a 14 horas, e de 16,30 a 20 horas, e os domingos e festivos de 11 a 14 horas.

Deixa unha resposta

Your email address will not be published.

Nova Anterior

200.000 euros para o Plan provincial de Emprego feminino

Seguinte Nova

Voltan os paseos en barca polo Cabe

Últimas noticias sobre CULTURA

   
A %d blogueros les gusta esto: