A Consellería de Cultura, Educación e Ordenación Universitaria reitera que as ratios de alumnos por aula e profesor nos colexios dos municipios da Montaña lucense están por debaixo da media española e mesmo da autonómica. Dende a Consellería suliñan que a media autonómica “é xa de por si unha das máis baixas do Estado”, polo que garanten unha “atención de calidade” ao alumnado.
Explican o exemplo do centro con máis matrícula da zona, o CEIP de Samos, que rexistra 28 alumnos, cunha relación de 14 alumnos por aula, “coa circunstancia de que, dada a dotación de persoal e as características do alumnado, algunhas ensinanzas poderán ser impartidas en grupos máis reducidos”, sendo a proporción deste centro de pouco máis de 9 alumnos por profesor. Nos casos dos centros de Triacastela, Baleira, Cervantes e O Incio, as respectivas cifras de alumnos son “sensiblemente inferiores” ao do colexio de Samos, explican. A Xunta insiste en que “a reorganización das unidades é unha prática habitual no comezo do curso, que busca un uso máis eficiente dos recursos educativos, sempre dentro do seu compromiso coa escola do rural e coa calidade do ensino”.
Cargando ...
