Turismo e hostelería, “os máis perxudicados” pola subida do IVE

Os responsables de Turismo da provincia temen o impacto destes axustes na actividade económica de Lugo

O turismo e a hostelería supoñen unha porcentaxe importante da actividade económica da área do sur de Lugo, tanto polos territorios vinculados ao Camiño de Santiago como aos municipios pertencentes á Ribeira Sacra. Arquivo EC.

As medidas de axuste aprobadas polo Goberno central están recibindo unha intensa réplica dende diversos frentes. Dende o Goberno provincial de Lugo, as críticas ó aumento do IVE e á supresión da paga extra de Nadal ós funcionarios centrou a crítica política dende os cargos nacionalistas. Así, o delegado de Cultura e Turismo da Deputación de Lugo, Mario Outeiro, denunciou que as medidas de recorte aprobadas polo Goberno do Estado “son perfectas para non saír da crise; están especialmente deseñadas para que a crise a paguen os autónomos, os funcionarios e os desempregados, e para profundizar nas diferenzas entre os cidadáns”.

ANUNCIO “INOPORTUNO” EN PLENA TEMPORADA ALTA DO TURISMO

Outeiro fixo fincapé na repercusión que a subida do IVE vai ter no sector turístico, “un dos que máis aporta ao Produto Interior Bruto español”, e calificou de “inoportuna” esta medida, anunciada “en plena temporada alta, o que podería causar cancelacións ou intranquilidade entre posibles visitantes nesta mesma campaña de verán”.

A ELIMINACIÓN DA “EXTRA” DOS FUNCIONARIOS AFUNDIRÁ A CAMPAÑA DE NADAL NO SECTOR SERVIZOS

Outeiro salientou que “o sector servizos será dos máis afectados pola suba do IVE e a retirada da paga extra de Nadal dos funcionarios”, medida que “rematará por sepultar ao sector servizos, en canto a campaña de Nadal era unha das máis fortes de todo o ano e que permitía a moitos negocios aguantar o resto do exercicio; sobre todo en cidades como Lugo, na que os empregados públicos supoñen máis do 27% dos traballadores en activo”.

MÁIS IMPOSTOS AOS AUTÓNOMOS

Fronte estas políticas de recorte, “que van potenciar a economía somerxida”, o delegado de Turismo da Deputación dixo que “son precisas outras de incentivo aos emprendedores e os autónomos que son os que crean riqueza e que, sen embargo, son outros dos colectivos máis atacados polas políticas do Goberno do Partido Popular tras a decisión de elevar os módulos dos autónomos, en concreto, no réxime especial de recargo de equivalencia, obrigatorio para comerciantes autónomos que venden a un cliente final”.

EMPOBRECEMENTO DO PAÍS E IMPUNIDADE DOS “AUTÉNTICOS CAUSANTES DA CRISE”

Pola súa parte, o vicepresidente da Deputación de Lugo e responsable da área de Benestar Social, Antonio Veiga, quixo amosar o seu “apoio a todas as mobilizacións sociais e ás protestas das persoas na rúa fronte aos recortes que vai a realizar o goberno do Estado”. Veiga calificou as medidas do Executivo de Rajoy como “un golpe de Estado co que se atraca ao pobo, se empobrece ao país e se deixa impunes aos auténticos causantes da crise económica e financeira que padece España”.

MEDIDAS “SOCIALMENTE INXUSTAS E TAMÉN ANTIECONÓMICAS”

Segundo os datos aportados dende o Goberno provincial, o aumento do IVE suporá unha media de entre 415 e 600 euros máis de gasto para as familias, e tan só en Galicia hai máis de 82.800 fogares con todos os membros da unidade familiar en paro que, ademais, verán reducida a súa prestación por desemprego. “Quizais Rajoy debería explicar a estas familias como afrontar este gasto, porque moitas non o poderán facer. A suba do IVE, a eliminación dunha paga extra para os funcionarios e o aumento da xornada laboral, a redución das prestacións de desemprego, e eventualmente a supresión de concellos de menos de 5.000 habitantes, ademais de seren socialmente inxustas son tamén anti-económicas e agravarán a crise”.

Deixa unha resposta

Your email address will not be published.

Nova Anterior

Axudas aos concellos do sur de Lugo para frear o abandono escolar

Seguinte Nova

Pantón, punto de partida do Viñobús nos domingos do verán

Últimas noticias sobre ECONOMÍA

A %d blogueros les gusta esto: