O concello substitúe equipos lumínicos por outros máis eficientes cunha axuda do Inega
Sober segue traballando pola mellora medioambiental e por unha xestión sostible dos recursos coa substitución de diversos equipos lumínicos por outros máis eficientes grazas a unha achega do Instituto Enerxético de Galicia (Inega), dependente da Consellería de Economía e Industria. A delegada territorial da Xunta en Lugo, Raquel Arias, durante a súa visita aos puntos de alumeado público que se están a sustituír, comentou a “especial relevancia que teñen este tipo de proxectos tanto polas repercusións económicas como medioambientais” nos pequenos concellos.
SUBVENCIÓNS A OITO CONCELLOS DO SUR DE LUGO
Arias lembrou que o departamento autonómico destinou axudas por importe de 269.395 euros, ata o 70% do investimento total, a oito concellos do sur de Lugo: os de Folgoso do Courel, Ribas de Sil, Pantón, Carballedo, Sober, Bóveda, O Saviñao e Quiroga. Estas axudas están destinadas á renovación das instalacións de iluminación pública exterior existentes aplicando criterios de aforro e eficiencia, así como as instalacións de semáforos.
NOVAS LUMINARIAS DE ALTO RENDEMENTO
Con esta axuda, as obras que se están a executar en Sober consisten na substitución de luminarias existentes por outras de alto rendemento lumínico, equipadas con lámpadas de haloxenuros metálicos con queimador cerámico, de alta eficiencia enerxética. A redución do consumo enerxético nestas dotacións coa renovación dos dispositivos chega ata o 50%. Ademais, instaláronse 4 estabilizadores redutores do fluxo luminoso, de tipo electrónico, con programadores astronómicos integrados, para o control das instalacións.
“COMPROMISO ECONÓMICO E MEDIOAMBIENTAL”
Raquel Arias destacou “o compromiso do Goberno galego para fomentar o aforro e eficiencia enerxética e as enerxías renovables”, con obxectivo de lograr “un maior aforro de enerxía primaria ao tempo que reducimos as emisións de CO2 á atmosfera”.
Cargando ...
