Severino Rodríguez reuniuse en Lisboa co mandatario luso
O alcalde de Monforte de Lemos e vicepresidente do Eixo Atlántico, Severino Rodríguez, valorou “moi positivamente” o encontro mantido en Lisboa co primeiro ministro portugués, Pedro Passos Coelho, o pasado 28 de xullo. O mandatario luso considerou “prioritario” o desenvolvemento da rede ferroviaria de mercadorías da fachada atlántica da Península, na que se sinala a Monforte como nodo loxístico fundamental en Galicia.
APOIO DOS GOBERNOS PORTUGUÉS E ESPAÑOL PARA MONFORTE
Severino Rodríguez lembrou que o compromiso do goberno portugués coa nova rede de transporte de mercadorías por ferrocarril súmase ao expresado con anterioridade pola ministra de Fomento española, Ana Pastor. A rede ferroviaría do corredor atlántico contará co financiamento de fondos europeos para a súa modernización no período 2014-2020. Nesta rede Monforte traballa por posicionarse como un dos principais nodos loxísticos da grande rexión Galicia-Norte de Portugal, ao articular a conexión cos portos portugueses desde Aveiro, por Salamanca.
