O domingo 12 de agosto, a partir das 16 horas, terá lugar esta tradicional proba, no Campo dos Birlos Suso Prado, na parroquia de San Fiz de Cangas de Pantón. Esta actividade, organizada pola Asociación Cultural O Castro e coa colaboración da Asociación de Veciños Santo Cristo de San Fiz de Cangas, ten como obxectivo rescatar e poñer en valor os xogos populares das nosas terras.
XANTAR POPULAR DO FESTIVAL DO CASTRO, O DÍA 18
Ata o 10 de agosto está aberto o prazo para inscribirse nesta actividade, a través do teléfono 676 545 776, cun custe de 20 euros que dá dereito a participar no Xantar Popular do Festival do Castro do día 18 de agosto, acto no cal se fará a entrega de premios. O V Torneo de Birlos está integrado por varias categorías de competición: maiores de 65 anos, mulleres, menores de 18 anos e menores de 40 anos. Dende a Asociación O Castro fan un chamamento á participación, xa que “é un xogo válido para ambos xéneros, o único preciso é non ter medo ó ridículo e ter moita maña”. Asimismo, gaban o traballo da Asociación Veciñal Santo Cristo “en prol dos xogos populares e da súa difusión como método para practicar actividade física deportiva, e contribuír á convivencia e interactuación social no medio rural”.
