As Festas de Chantada están marcadas este ano polos cambios na localización dalgúns dos eventos máis significativos, así como polos recurtes no orzamento para a organización. Según adiantou Diego Otero Veiga, presidente da Comisión de Festas, “buscamos defender a idiosincrasia das Festas de Chantada, apostando por manter as actividades como Carrilanas ou o Festival de Bandas, elementos singulares fronte a outras festas da contorna, e repercutir a baixada do presuposto en orquestras e actuacións musicais”. Otero comentou ademais que o Folión de Carros, actividade na que contribúen economicamente, “modificará tamén o seu percorrido polo tema da saída das carrozas, que todos os anos dá problemas e neste se tentará resolver un pouco”. Por outra banda, decidiron emplazar as barracas na explanada diante da Residencia, “para evitar todas as molestias que supoñía a recolocación do mobiliario urbano na rúa principal”, e para a Festa da Empanada están buscando unha alternativa á carballeira de Sobreira, “que é privada, polo que trataremos de ubicala nunha parcela de titularidade pública”.
PROGRAMA DE ACTOS
No que ao programa se refire, na tarde do día 23, o Campo da Feira Vello acollerá as tradicionais Olimpiadas Rurais por grupos. O venres 24 de agosto pola tarde, as Carrilanas realizarán a súa singular baixada polas rúas do centro da vila, e antes haberá motoplásticas e outras actividades para os máis pequenos. A xornada rematará cunha actuación musical. Pola súa parte, o sábado 25 acollerá a partir das once da noite a celebración do Folión de Carros, coa actuación dunha orquestra na Plazuela. O día grande abrirase con pasarrúas pola mañá, procesión e concerto dunha Banda Tradicional, que será un pequeno adianto da celebración, na tarde do domingo, do Festival de Bandas na Praza do Cantón. A verbena da noite estará amenizada por dúas orquestras. O luns 27 acollerá a novidade destas Festas, cunha sesión de xogos populares ao longo da tarde no parque Elisa Rivadulla. Á noite, cita cos fogos artificiais e unha verbena a cargo de dúas orquestras. Por último, o martes celebrarase a Festa da Empanada, que posiblemente contará cunha actuación musical, e xa á noite, dúas orquestras pecharán as festas de Chantada.
BOS PREZOS NA SEMANA FANTÁSTICA
Pola súa parte, os comerciantes siguen con iniciativas dinamizadoras da vida local, aproveitando o impulso do verán e do ambiente festivo. Así, dende o Centro Comercial Aberto de Chantada están ultimando a Semana Fantástica, na que do 20 de agosto ao 3 de setembro, os comercios adheridos ofrecerán os seus produtos, maioritariamente calzado e téxtil, cunha “rebaixa sobre a rebaixa”, según explica José Manuel Lage, presidente do CCA. “Este ano hai máis locales adheridos, é unha iniciativa que os comerciantes piden porque lles funciona, sobre todo en tempos como estes e para mover a roupa de tempada”, explica Lage. “Por iso adaptamos as datas de celebración ás demandas dos comerciantes, para que resulte todo un éxito”.
