A Unidade Asistencial de Drogodependencias (UAD) de Monforte está a desenvolver dende finais de agosto unha serie de actividades informativas para favorecer o cambio de hábitos que, en ocasións, supón a volta á vida cotiá tralo descanso vacacional. Deste xeito, na mañá do pasado 28 de agosto a rúa do Cardeal acolleu unha mesa informativa onde o Equipo de Prevención da UAD informou a pé de rúa sobre os riscos do tabaco e outras sustancias como alcol e drogas ilegais, así como doutras adiccións como as ludopatías, e sobre o xeito de superar estas dependencias.
Para os vindeiros días, os responsables da UAD anunciaron que levarán a cabo unha campaña informativa na que se pedirá colaboración aos hostaleiros de Monforte para que todos os fumadores que desexen deixar este hábito teñan información a través dos camareiros. Asimesmo, o 13 de setembro desenvolverase un obradoiro sobre tabaquismo realizado pola Escola Galega de Saúde para Cidadáns, dependente do SERGAS. Este obradoiro impartirase no Hospital de Monforte e estará aberto ao público en xeral de forma gratuíta, previa inscrición. Para máis información, os interesados poden dirixirse á UAD na rúa Otero Pedrayo s/n, ou contactar no teléfono 982 400495 e no e-mail uadmonforte@yahoo.es.
