A Xunta destinou dende 2009 preto de 900.000 euros para o fomento da agricultura ecolóxica

Durante a súa visita á sede do CRAEGA en Monforte, a titular de Medio Rural suliñou que o valor da produción certificada na nosa Comunidade medrou máis do tres mil por cento na última década

A conselleira de Medio Rural e do Mar, Rosa Quintanta, acompañada do director xeral de Montes, Tomás Fernández-Couto, e do presidente do Consello Regulador da Agricultura Ecolóxica de Galicia (CRAEGA), José Antonio Fernández, durante a súa visita a Monforte en maio deste ano. Arquivo EC.

O compromiso da Xunta de Galicia coas producións galegas de calidade diferenciada amosouse nas cifras que nestes días presentou a conselleira de Medio Rural e do Mar, Rosa Quintana, na súa visita a Monforte. A titular autonómica visitou a sede do Consello Regulador da Agricultura Ecolóxica de Galicia (CRAEGA), con sede na cidade do Cabe, e lembrou que dende 2009 a Xunta destinou preto de 900.000 euros ao fomento da agricultura ecolóxica.

“COMPROMISO” COA CALIDADE DIFERENCIADA

Rosa Quintana explicou que o apoio da Xunta a este sector enmárcase no compromiso xeral do Executivo galego a prol das producións galegas de calidade diferenciada, e na colaboración que se mantén, neste sentido, cos diferentes consellos reguladores, entre eles o CRAEGA. Quintana apuntou que só en 2012 as achegas da Xunta a este eido produtivo superan os 300.000 euros, que se destinaron a diferentes medidas de fomento, promoción, mellora e control.

TRANSVERSALIDADE DA AGRICULTURA ECOLÓXICA

Asimesmo, a titular de Medio Rural destacou que a agricultura ecolóxica ten a bondade de ser “transversal”, xa que pode amparar producións agrícolas, gandeiras e mesmo mariñeiras. Engadiu ademais que o seu valor ven dado non só polo que representa en termos económicos, senón tamén “polo seu efecto demostración”, no sentido de que sinala o camiño a seguir para moitas producións. Segundo apuntaron os responsables do CRAEGA, o valor da produción certificada medrou por riba do tres mil por cento na última década, pasando de medio millón de euros en 2001 a 21,8 millóns en 2011.

EVOLUCIÓN POSITIVA

A superficie inscrita no CRAEGA medrou dende as 2.000 hectáreas do 2001 ás 15.000 actuais. Asimesmo, o número de operadores (produtores e elaboradores) pasou de 217 en 2001 a 586 no 2011, o que representa un incremento do 170%. Só en 2011 o número de operadores medrou nun 2,27%, a superficie inscrita creceu nun 8% e o volume de ventas aumentou un 27,7%.

Deixa unha resposta

Your email address will not be published.

Nova Anterior

Presentados os achados de arte rupestre da Cova Eirós, en Triacastela

Seguinte Nova

Solicitan a reposición dun surtidor de auga na zona deportiva da Lama, en O Saviñao

Últimas noticias sobre ECONOMÍA

     
A %d blogueros les gusta esto: