A Asociación de Amigos do Románico organizou en agosto unha xornada de actividades na igrexa de Pesqueiras, con música, teatro, poesía e arte

A actividade cultural de Chantada enriqueceuse este verán grazas á iniciativa da Asociación de Amigos do Románico da Comarca de Chantada, que organizaron o pasado 12 de agosto unha xornada de música, poesía, arte e teatro no singular esceario da igrexa de Pesqueiras. Esta actividade, que congregou a numeroso público, contou coa presenza do alcalde de Chantada, Manuel Varela, e o secretario xeral de Política Lingüística, Valentín García, en representación da Consellería de Cultura, Educación e Ordenación Universitaria, que colabora con estas iniciativas que dende asociacións veciñais e sen ánimo de lucro pretenden “colaborar dun xeito moi efectivo a mellorar o gran patrimonio arquitectónico de Galicia”.

Ao longo da xornada os presentes asistiron ás actuacións musicais de O Trícole e do grupo A Quenlla, Mini e Mero; así como o recital poético a cargo de Antonio José Queirós, Manolo Regal Ledo e Olga Porral. Ademais, presentouse a obra teatral “Auto do demo e da viñateira”, a cargo de Clara Vázquez e Chico Carballido; tras a que se celebrou unha misa e interveu a artista Ana Sastre, especializada na reprodución de tallas románica en papel maché.

O Secretario Xeral de Política Lingüística valorou na súa intervención “o grande mérito que teñen na sociedade galega este tipo de traballos que complementan as levadas a cabo por institucións públicas e outro tipo de entidades”, e suliñou que as actividades organizadas pola Asociación de Amigos do Románico da Comarca de Chantada “teñen especial importancia, para conseguir o obxectivo de poñer en valor a igrexa de Pesqueiras, coas súas peculiaridades, así como os seus accesos”.