O XI Premio Ramón Piñeiro-Facer País recaeu no escritor de Vilalba fronte a 45 candidaturas
Carlos López Sierra e Manuel Fernández Arrojo, secretario e directivo da Asociación Cultural Val de Láncara, organizadora do premio Ramón Piñeiro-Facer País, xunto con Xurxo Rodríguez Lozano, do CPI Ramón Piñeiro de A Pobra de San Xiao, comunicaron o pasado 14 de setembro a decisión do xurado de conceder este galardón, na súa undécima edición, ao escritor, pedadogo e activista cultural nado en Vilalba Agustín Fernández Paz. O fallo do xurado deuse a coñecer nun acto celebrado no Consello da Cultura Galega en Santiago de Compostela, e a entrega do premio, que carece de dotación económica, terá lugar en Láncara a finais do mes de outubro.
VALORACIÓN DO SEU TRABALLO LITERARIO, PEDAGÓXICO E A PROL DA CULTURA GALEGA
O xurado valorou a candidatura de Fernández Paz, entre as 45 que foron consideradas nesta undécima edición do premio Ramón Piñeiro-Facer País, polo seu “decidido compromiso con Galicia e a lingua galega”. Os membros do xurado suliñaron tamén, alén da “innovadora e longa obra narrativa, traducida e recoñecida do premiado e o seu traballo a prol da renovación pedagóxica”, o feito de que a súa obra “en tempos de globalización permite a incorporación das novas xeracións ao coñecemnto dos valores propios da cultura e a lingua galegas”.
“LABOR CONSTANTE E CALADO PARA FACER PAÍS E DEIXAR EN HERDO ÁS NOVAS XERACIÓNS UNHA GALICIA ANOVADA”
Asimesmo, o xurado destacou en Fernández Paz “a súa peripecia vital e profesional no ámbito educativo e a sinxeleza do seu carácter, sempre alleo a xestos e actitudes personalistas e de autocompracenza”, que o fan “merecedor de ser considerado un dos bos e xenerosos que co seu labor constante e calado andan a facer país e ensinan a facer país ás xeracións que recibirán en herdo unha Galicia anovada”.
LÁNCARA, BERCE DO INSIGNE GALEGUISTA RAMÓN PIÑEIRO
O premio Ramón Piñeiro-Facer País, organizado pola Asociación Cultural Val de Láncara, foi creado para honrar a memoria do galeguista Ramón Piñeiro López, nado en Láncara en 1915, e que foi primeiro presidente do Consello da Cultura Galega.
PREMIO DE IMPORTANTE TRAXECTORIA NA CULTURA GALEGA
A traxectoria deste premio inclúe premiados de grande prestixio e pertencentes a diversos eidos da vida cultural, artística e social de Galicia, como Isaac Díaz Pardo, o grupo folk Milladoiro, o periódico A Nosa Terra, o político e economista Xosé Manuel Beiras, a Real Academia Galega, e escritores como Avelino Pousa Antelo, Luz Pozo Garza e Xosé Neira Vilas. Esta edición contou coa colaboración da Área de Cultura da Deputación Provincial de Lugo, o Concello de Láncara, Caixa Rural Galega, Escola de Arte Superior e Deseño Ramón Falcón, e o CEIP Ramón Piñeiro de A Pobra de San Xiao.
Cargando ...
