O Museo Etnográfico mantén unha afluencia media de máis de 1.700 visitantes ó ano, e o Museo Xeolóxico está a acoller con éxito diversas iniciativas relacionadas coa ciencia e a natureza
Os museos Xeolóxico e Etnográfico do Concello de Quiroga acadaron no que vai de ano un total de 4.000 visitantes, 2.168 deles corresponderon ao Museo Etnográfico e 1.832 o Museo Xeolóxico. Os responsables municipais destacaron o feito de que algo máis do 90 % dos visitantes proceden de fóra de Quiroga.
GRAN AFLUENCIA DE VISITAS DE ESCOLARES E ASOCIACIÓNS CULTURAIS
Un 17 % dos visitantes acuden a visitar os museos quirogueses en pequenos grupos o en solitario, sen cita previa, mentres que o 83 % restante intégranse dentro de grupos de máis de 10 persoas que acordan previamente unha visita guiada. Os responsables municipais destacaron, dentro deste último grupo, a numerosa presenza de centros de ensino tanto de infantil e primaria como de secundaria, así como asociacións culturais de toda a comunidade autónoma.
O Museo Etnográfico mantén dende a súa apertura no ano 2007 unha afluencia media que supera os 1.700 visitantes anuais. Dada a xuventude do Museo Xeolóxico (inaugurado en decembro de 2011), aínda non se pode establecer unha comparación con anos anteriores. Según explicaron dende o Concello, o Museo Etnográfico superou amplamente a media dos anos anteriores, tendo en conta ademais que aínda faltan dous meses para rematar o ano.
Estas cifras veñen apoiadas por unha serie de actividades que dinamizaron os museos. O Museo Etnográfico acolleu un primeiro obradoiro de tecido tradicional con 17 mulleres inscritas de Monforte, Ribas do Sil e Quiroga), e a instalación da exposición permanente dos decorados da película de animación galega “O Apóstolo”, ademais da colaboración anual co programa “Preescolar na Casa” e a demostración na rúa dun fiadeiro tradicional. Asimesmo ao longo deste ano incorporáronse á colección deste Museo 23 novas pezas. Pola súa banda, o Museo Xeolóxico acolleu varias xornadas de portas abertas con visitas guiadas, e durante as primeiras xornadas de Xeoloxía na Ribeira Sacra organizadas polo GDR Ribeira Sacra se realizou unha visita especial.
Está prevista a realización de novas actividades de dinamización, como un Obradoiro de Arqueoloxía no Museo Xeolóxico e a apertura no Museo Etnográfico dunha exposición permanente de fotografías antigas, na que se mostrarán aos verdadeiros protagonistas desta colección etnográfica realizando os seus traballos.
