A comisión executiva do Eixo Atlántico, formada por doce alcaldes portugueses e galegos, aprobou a proposta do Mapa de Infraestruturas que recoñece como nodo a Monforte
• Recuperar o papel fundamental do ferrocarril para Monforte é o obxectivo que subxace a todo o proceso de xestións que, a través da acción conxunta exercida dende o Eixo Atlántico, está a desenvolver o rexedor monfortino, Severino Rodríguez. Nesta estratexia de traballo, o alcalde de Monforte está a contar co apoio dos sectores sociais e grupos políticos da cidade, e nos últimos meses concitou asimesmo o apoio dos gobernos portugués e español, e as xestións realizadas diante da Unión Europea evolucionan favorablemente. Espérase que na vindeira reunión do Consello Xeral da Unión Europea, que terá lugar en novembro, a Comisión Europea aprobe a proposta do Eixo Atlántico, e convirta a Monforte en nodo loxístico de mercadorías.
MONFORTE APROVEITA AS SINERXIAS DA EURORREXIÓN GALICIA- NORTE DE PORTUGAL
Concretar esta recuperación do ferrocarril como dinamizador económico da cidade pasa por integrar a Monforte na rede europea de mercadorías como un dos enlaces, xunto á vila portuguesa de Aveiro, dos portos atlánticos coa Meseta, o que traería consigo un desenvolvemento loxístico vinculado ao pulo do Porto Seco. Posto que a proxección destas infraestruturas ten un carácter global para o conxunto da Eurorrexión Galicia-Norte de Portugal, o alcalde de Monforte apostou pola xestión conxunta dende esta entidade, “un camiño lento pero seguro”, según explicou durante a reunión da Comisión Executiva do Eixo Atlántico o 10 de outubro no Parador de Monforte. Nesta xuntanza, celebrada por vez primeira na vila do Cabe, Severino Rodríguez, en calidade de vicepresidente do Eixo Atlántico, afirmou que a elección da nosa cidade para este encontro “apoia a Monforte como cidade do transporte de mercadorías, e afianza o seu papel no Mapa de Infraestruturas”.
MONFORTE, CONEXIÓN ENTRE O MAR E A MESETA
Precisamente, este documento foi o asunto central da Comisión, que aprobou a proposta de actualización do mapa de infraestruturas viarias, portuarias e ferroviarias dentro do Eixo Atlántico. Este documento establece que os portos galegos conectarán, a través de Monforte, coa liña de mercadorías Aveiro-Salamanca-Valladolid, según explicou o secretario xeral do Eixo, Xoán Vázquez Mao. As características deste Mapa de Infraestruturas, que supoñen a modernización da liña férrea do Miño entre Porto e Vigo, e sitúan como saída das mercadorías por ferrocarril de Galicia a través de Monforte de Lemos, polo norte, e de Aveiro, polo sur, serán “un éxito”, como destacou en Monforte o presidente do Eixo Atlántico, José María Costa, “porque favorecerá a creación de emprego” debido a que a Estratexia Marítima que defende esta entidade “beneficiará aos concellos do interior”.
A ESTRATEXIA MARÍTIMA DO EIXO ATLÁNTICO BENEFICIARÁ TAMÉN AOS CONCELLOS DO INTERIOR
Esta Estratexia Marítima, que o Eixo Atlántico está a elaborar baixo a dirección do profesor Fernando Gónzalez Laxe, pretende integrar asimesmo aos responsables comunitarios, dado o carácter referencial que este documento terá na asignación de fondos comunitarios para a fachada marítima da Península Ibérica. Previo ó encontro de Monforte, a Directiva do Eixo Atlántico reuniuse en Bruxelas cos responsables europeos da Estratexia do Atlántico, para trasladarlles a necesidade de que este documento contemple o apoio ás infraestruturas loxísticas do interior, como o Porto Seco de Monforte, para garantir o impacto da economía marítima no eixo interior da Eurorrexión.
RESPONSABLES DA UNIÓN EUROPEA PARTICIPARÁN NA VINDEIRA REUNIÓN EN MONFORTE
Os membros da directiva do Eixo Atlántico manifestaron a súa satisfacción polos resultados das súas xestións en Bruxelas. Os responsables da Unión Europea confirmáronlles que a modernización da liña férrea do Miño é unha prioridade para os gobernos de España e Portugal, tras manifestar estes a súa intención de solicitar fondos na convocatoria extraordinaria de novembro, e destinar unha partida nos presupostos do Estado para iniciar os traballos.
Asimesmo, os responsables comunitarios aceptaron a invitación do Eixo Atlántico para acudir a principios de novembro a un cumio, que previsiblemente se celebrará en Monforte, sobre as liñas ferroviarias de pasaxeiros e mercadorías na Eurorrexión.
