RAQUEL ARIAS RODRÍGUEZ, número 1 do Partido Popular pola provincia de Lugo:“A nosa teima para a próxima lexislatura serán os emprendedores”

• Encabeza a lista do Partido Popular pola provincia de Lugo. Fáganos unha diagnose, aínda que breve, da saúde socioeconómica desta provincia.

Lugo non está illada da situación económica que está a vivir o continente, a crise máis grande dos últimos 80 anos. Aínda así, tras os tres anos e medio de goberno de Feijóo, a provincia de Lugo é hoxe máis competitiva e hai unha maior atención ás necesidades das persoas. Proba disto son as 450 empresas que se beneficiaron do ImpulsaLugo, recibindo axudas para a súa creación, modernización ou internacionalización. Tamén a mellora tecnolóxica a través da extensión da banda larga, que elevou a porcentaxe de cobertura de internet de alta calidade do 35% ao 85% na Ribeira Sacra. Lugo ten hoxe menor ratio de alumnos por mestre e o fracaso escolar está cinco puntos por debaixo do que o deixou o bipartito. Hai 500 prazas máis en residencias e centros de día, e atendemos na provincia a catro veces máis persoas dependentes das que se atendían co bipartito. O paro rexistrado en Galicia está catro puntos por debaixo da media española. Pero sabemos que quedaron moitas cousas por facer. Non podemos estar satisfeitos mentres haxa paro –esa foi e será a nosa maior preocupación e ocupación– ou mentres queden persoas con dependencia sen atender.

Raquel Arias Rodríguez, nº1 pola provincia de Lugo do Partido Popular. Foto cedida.

Nesta situación que describe, hai que falar dos sectores produtivos nun contexto de crise económica. Dende o sector agrogandeiro están a reclamar á Administración unha resposta á crise que atravesan. Qué lle propón o Partido Popular?

O PP, dende o primeiro momento estivo a apoiar o sector gandeiro, efectivamente, un dos que máis sufre a situación actual. Neste tempo, axudamos a mellorar a súa competitividade e insuflamos liquidez nas explotacións, habilitando 20 millóns de euros extra de axuda directa na crise de prezos de 2009, ou 12 millóns de euros extra sobre o Plan de Desenvolvemento Rural para investir en medidas de aforro enerxético, ou ben establecendo liñas de axuda financeira. Pero non se nos escapa a ninguén que a maioría das decisións no sector agrogandeiro dependen de Madrid e mesmo de Bruxelas. Por iso, dende o primeiro momento, o presidente Feijóo negociou co goberno de Madrid para mellorar as condicións deste sector, e teño que dicir claramente que se conseguiu máis en 9 meses cun Goberno estatal do PP que en case 8 anos de goberno socialista. E por iso temos aprobado o paquete lácteo e proximamente chegará á Cámara a lei da cadea de valor, para saber exactamente onde quedan as ganancias do leite, e que ao produtor se lle pague en función do que lle custa a produción.

Poden os emprendedores confiar en que Lugo é unha terra de oportunidades? Canto pesan os emprendedores na proposta do Partido Popular?

Lugo é unha terra de oportunidades para os emprendedores, tanto no sector primario como na industria. Temos aínda a disposición dos empresarios 558.600 metros cadrados de chan industrial en 16 polígonos da provincia. Nesta lexislatura rematáronse obras en catro polígonos industriais e puxéronse á venda as parcelas dos mesmos. Así mesmo, están practicamente rematadas as obras da primeira fase do Porto Seco de Monforte, máis de 130.000 metros cadrados que superan os 5 millóns de euros de inversión, ao que hai que sumar os accesos á N- 120 e ás estradas LU-533 e LU-546, que supoñen un investimento de 24 de euros. Temos en marcha o ImpulsaLugo, que favorece ás empresas radicadas nesta provincia –e de xeito específico aos emprendedores– con distintas medidas; está en marcha, como lle dicía, un plan de extensión das novas tecnoloxías, e estamos dando un pulo importante ás infraestruturas, como a VAC Sarria-Monforte. A nosa teima para a próxima lexislatura serán os emprendedores: Van ter liñas de axuda concretas para poder manterse dende que establezan a súa empresa ata que esta empece a dar ganancias. No eido educativo, xa iniciamos o camiño adaptando as titulacións da Formación Profesional ás necesidades do mercado laboral; agora propoñemos a formación profesional dual, que permite ao alumnado realizar o 77% das horas lectivas nun centro de traballo con contrato remunerado. En todos os países desenvolvidos o apoio ao emprendemento é unha peza clave, e nós queremos dar o merecido valor aos emprendedores.

Servizos sociais e educación centraron polémicas sociais e políticas no último ano. O Partido Popular terá unha mensaxe que darlles aos nosos maiores en canto á atención sociosanitaria, e aos pais e nais do alumnado dos centros públicos en canto á garantías de calidade e atención educativas.

Nesta lexislatura multiplicamos por 6 o número de persoas con dependencia atendidas na comarca de Lemos e investimos máis de 11 millóns de euros no mantemento e mellora dos servizos sociais básicos, como a creación de 180 novas prazas para persoas da terceira idade na residencia do Morín. E, por certo, o custe desas prazas ao ano, 4 millóns de euros, é equivalente ao aforro que lle supuxo aos galegos a redución da nómina de altos cargos nesta provincia coa posta en marcha da Delegación Territorial por parte desta Xunta.
Prestamos especial atención á mellora dos centros educativos. Na comarca de Lemos destinamos máis de 1,3 millóns de euros a obras en colexios e institutos, destacando, entre outras, a reforma do IES Río Cabe. Pero sobre todo fixemos un gran esforzo pola modernización do ensino, coa dixitalización das aulas a través do programa Abalar e o impulso á aprendizaxe de linguas estranxeiras. Así, temos en Lemos 7 centros que forman parte da rede Abalar, e 11 colexios e institutos da zona dispoñen de seccións bilingües. Igualmente, quero recordar que Galicia ten as taxas universitarias máis baixas de España. Traballamos para que todos os nenos e rapaces galegos teñan acceso a un ensino público de calidade.

Son tempos complicados para todos, con cifras inauditas de paro e un crecente desalento na cidadanía, que reclama dos xestores públicos unha mensaxe clara. Díganos cal é a mensaxe do Partido Popular para os lucenses.

Gobernamos con seriedade e responsabilidade. Hoxe somos a comunidade máis solvente e cumprimos cos obxectivos de déficit. Iso non é unha obra que se ve, pero afecta a todas as políticas que poidas facer. Na época de maior crise e cunha Galicia ao borde da quebra, en menos de catro anos conseguimos: Pagar as débedas, pagar aos provedores, cumprir o déficit, ter máis residencias, máis garderías, máis centros de día, máis dependentes atendidos. Hoxe somos a comunidade máis preparada para iniciar o crecemento, crear postos de traballo e blindar o estado do benestar.

Deixa unha resposta

Your email address will not be published.

Nova Anterior

ELECCIÓNS 21-O:A provincia de Lugo escolle aos seus representantes no Parlamento de Galicia

Seguinte Nova

CONCEPCIÓN BURGO LÓPEZ, nº 1 do Partido Socialista pola provincia de Lugo:“Os lucenses non deben resignarse porque “isto é o que hai”: as cousas poden facerse doutro xeito”

Últimas noticias sobre ASOCIACIONISMO

A %d blogueros les gusta esto: