Mellora do servizo de auga, eliminación da insalubridade derivada das fosas sépticas, e mellora da seguridade vial son os obxectivos que dende o Concello de Pantón están a procurar ao longo deste ano a través de diversas actuacións nas infraestruturas urbanas. Neste mes de outubro a Consellería de Medio Ambiente ven de licitar o conxunto de traballos correspondentes á segunda fase do saneamento de augas residuais dende a capitalidade ata Eiré, por un importe total de 335.074,29 euros, a executar nun prazo de seis meses.
UNHA OBRA “MOI IMPORTANTE” EN TRES FASES
Según explica o alcalde de Pantón, José Luis Álvarez, as obras da primeira fase deste colector, o tramo ata Ferreira, xa están completadas, e espérase completar a terceira fase o vindeiro ano. “Estas obras son de gran importancia para a poboación, porque supoñen unha maior calidade de vida ao eliminar as fosas sépticas, con todo o risco que conleva a súa presencia, e poder dispoñer destes servicios é positivo para todos”, suliña o rexedor local. As actuacións de mellora do saneamento no termo municipal de Pantón son unha das prioridades da xestión municipal deste ano. Neste sentido, a Consellería de Medio Ambiente, Territorio e Infraestruturas licitou o pasado mes de agosto as obras de saneamento da parroquia de Santa María de Toiriz, por un importe de máis de 470.000 euros. Asimesmo, dende o Concello de Pantón están a acometer arranxos na rede de suministro de auga dende Ferreira a Toldaos e Moreda, onde se estaban rexistrando roturas debidas ao deterioro das tuberías polo paso do tempo.
MELLORA DOS VIAIS URBANOS
O Concello de Pantón contempla a mellora da seguridade vial ao longo da rúa de Ourense, e dos seus accesos á Carballada e ao Campo da Feira. Ditas actuacións, que previsiblemente comezarán en decembro, son o resultado dun convenio entre o Concello de Pantón e a Consellería de Medio Ambiente, que aportará preto de 100.000 euros a través da Axencia Galega de Infraestruturas. O obxectivo é a mellora do firme para toda a calle de Ourense, e a rede de saneamento do Paseo da Deputación.
