Aumenta en medio millón de euros o apoio da Xunta para a promoción dos nosos viños no exterior

A Consellería do Medio Rural e do Mar aprobou este mes unha ampliación de 542.747 euros do crédito destinado ás axudas para a execución de medidas de promoción do sector vitivinícola galego nos mercados de países terceiros. Os beneficiarios destas axudas, publicadas o pasado 25 de outubro no Diario Oficial de Galicia, son principalmente as adegas e os consellos reguladores das cinco denominacións de orixe vitivinícolas galegas. As axudas, que poden chegar ata o 50% do gasto aprobado, teñen como obxectivo a financiación de actuacións de promoción dos nosos viños nos mercados de países non pertencentes á Unión Europea. As accións que se financian son, entre outras, campañas publicitarias, promocións en puntos de venda, deseño e edición de material promocional destinado a eses mercados, misións comerciais, presenza en feiras e exposicións, e elaboración de estudos de mercado.