O equipo de Animación Sociocultural do Concello de Bóveda sorprendeu este ano cunha celebración moi especial do Día da Biblioteca. Este espazo tan especial e ás veces esquecido por moitos, onde esperan historias, viaxes, descubrimentos e, en definitiva, todo o coñecemento universal. Só fai falta acudir á Biblioteca Municipal para mergullarse en tan interesante mar de saberes e lecer.
“SOLTA DE LIBROS” POLOS COMERCIOS
Para mover á xente a visitar a Biblioteca de Bóveda, os responsables municipais desenvolveron o pasado 24 de outubro unha xornada de portas abertas para a cidadanía en xeral e tamén para os escolares. Previamente, realizaron unha “solta” de libros polos establecementos comerciais do municipio, para que a clientela poidese coñecer diversos exemplares do fondo de libros da Biblioteca Municipal, e ser invitados a coñecer as súas instalacións. A acollida foi “moi boa”, según recoñecen os responsables do equipo de Animación Sociocultural, “xa que houbo moita xente que recoñeceu non saber que había este tipo de libros na biblioteca, e que lle parecían moi interesantes”.
REGALO DUN LIBRO AOS VISITANTES
O chamamento surtiu efecto, e foron moitos os que visitaron a Biblioteca de Bóveda ao longo do día 24 entre as once da mañá e as sete e media da tarde. O estímulo da visita, e o saber que a biblioteca conta con preto de 5.500 exemplares de fondo conseguiron incorporar unha ducia de novos socios nun só día. O premio para tan fiel parroquia foi o agasallo dun libro a todos aqueles que acudiron á chamada. E seguindo co traballo que ao longo de todo o ano se desenvolve para fomentar a lectura nos máis novos, o alumnado de Educación Infantil do CEIP Rosalía de Castro visitou a Biblioteca como cada quince días, pero neste caso a visita foi especial, pois asistiron a un contacontos para celebrar o Día da Biblioteca.
Cargando ...
