Monforte, cidade universitaria:Xornada de portas abertas na Aula da UNED

O alcalde de Monforte, Severino Rodríguez, amosou aos docentes da comarca as características da Aula da Universidade Nacional a Distancia (UNED) situada na Casa da Cultura. F.Cedida.

Ciencias Ambientais, Administración e Dirección de Empresas, Dereito, Turismo, Enxeñería Informática, Socioloxía ou Historia da Arte son, entre outros, algúns dos Graos universitarios oficiais que poden cursarse a distancia dende a Aula que a Universidade Nacional de Educación a Distancia (UNED) ten aberta en Monforte de Lemos, ademais de realizar de xeito presencial os Estudios de Acceso á Universidade para maiores de 25 anos, e o Grao en Educación Social. Para dar a coñecer as novas instalacións, equipamento e programación académica á cidadanía, dende a dirección da UNED en Lugo e o Concello de Monforte organizaron unha xornada de portas abertas coincidindo coa apertura do curso académico 2012-2013 o pasado 18 de outubro.

VANTAXES DA UNIVERSIDADE A DISTANCIA

Durante esta xornada, un grupo de docentes e directores dos centros educativos da comarca desenvolveron unha visita guiada polas instalacións, situadas nas dependencias da Casa da Cultura de Monforte, onde o alcalde, Severino Rodríguez, e o director da UNED en Lugo, José Luis Prieto Arroyo, explicaron as innovacións metodolóxicas e tecnolóxicas que incorpora esta modalidade formativa para que poidan transmitir as vantaxes deste sistema aos seus alumnos. Prieto Arroyo comentou aos docentes que a UNED está rexistrando un gran incremento de matrículas, especialmente de xente moza, e que a idade media do seu alumnado atópase arredor dos 37 anos. O director da UNED en Lugo salientou a enorme facilidade de cursar unha carreira universitaria dende a casa, cun ordenador e unha web, así como as múltiples posibilidades formativas que ofertará a UNED Aberta en forma de cursos, simposios e congresos que se poden seguir dende a casa de xeito gratuíto.

OS EMPRESARIOS LOCAIS AMOSAN O SEU INTERÉS

Esta xornada de portas abertas adicou un espazo ao empresariado local. Un grupo de empresarios monfortinos visitaron as aulas e asistiron a unha videoconferencia co director do INTECCA e doutor en Economía Jorge Vega Núñez, quen lles falou sobre as “Aportacións da tecnoloxía ó desenvolvemento empresarial”. Asimesmo, o alcalde de Monforte puxo a disposición do empresariado local as instalacións e os medios tecnolóxicos da UNED de Monforte. Trala visita, os empresarios amosaron o seu interés pola oferta de cursos específicos da UNED para o mundo empresarial, así como pola posible colaboración coa Universidade que redunde en beneficio dos seus negocios.

Deixa unha resposta

Your email address will not be published.

Nova Anterior

Aposta pola renovación das infraestruturas urbanas en Pantón

Seguinte Nova

Os colexios de Monforte implícanse no programa medioambiental do Concello

Últimas noticias sobre CULTURA

A %d blogueros les gusta esto: