Sober disporá dun mirador que desafía ao futuro. No lugar de Cotarro en Bolmente foi instalada nestes días a plataforma de madeira e aceiro cortén deseñada con criterio escultórico que, según os seus promotores, “está realizada de xeito que permita apreciar mellor as sensacións visuais e sonoras que caracterizan a paisaxe da Ribeira Sacra”. A recepción destes traballos que remodelan o miradoiro da Cividade, comezados en xuño e nos que a Secretaría Xeral para o Turismo investiu 113.059 euros, tivo lugar nestes días, coa presenza do alcalde de Sober, Luis Fernández Guitián, e a xefa de servizo da Xefatura Territorial da Delegación da Xunta de Galicia en Lugo, Paloma Vázquez Fernández.
CORES DA NATUREZA
A remodelación deste espazo turístico implicou unha actuación no contorno da plataforma. Así, dende un punto de vista funcional, o miradoiro suprime a perigosa pendente do último tramo do camiño, facendo que o arranque do pavimento siga a pendente suave do primeiro tramo. O tramo horizontal do miradoiro ten unha lonxitude de trinta e tres metros e unha anchura de sete metros. Según explicaron os responsables da remodelación, os primeiros oito metros aséntanse sobre un terraplenado de pedra, a partir diso o miradoiro vai collendo altura sobre o terreo ata acadar unha elevación de catro metros sobre o miradoiro preexistente. A pasarela está contruída con entaboado de madeira, creando un acceso acorde ao conxunto para que sobre esta estrutura se poida apreciar a contorna clara e permita ao usuario sentirse integrado no medio. Esta integración tamén abrangue á elección de cores e materiais desta estructura, onde o aceiro cortén amosa a cor da cortiza das árbores, e o resto é madeira.
