Apoio institucional ás festas máis nosas

Dende a Área de Cultura da Deputación de Lugo están a desenvolver unha serie de actuacións en defensa das festividades máis singulares e con máis tradición do sur de Lugo. A comezos do mes de novembro, o ente provincial firmou un convenio cos responsables da asociación Souto do Val de Quiroga por importe de 4.000 euros destinados a sufragar os gastos da celebración da saída do Meco e as Pampórnigas na parroquia quiroguesa da Ermida. Esta tradición ancestral ten lugar durante a romaría dos Remedios, do 8 ao 9 de setembro, e polas características do personaxe do Meco garda relación con outras romarías galegas, como a dos Remedios de Castro Caldelas.

O delegado de Cultura da Deputación de Lugo, Mario Outeiro, conversa coa representante da asociación Souto do Val de Quiroga, Amparo Montenegro Díaz, durante a firma do convenio en apoio da saída do Meco e as Pampórnigas, tradición ancestral celebrada na parroquia da Ermida durante a romaría dos Remedios. GPDL.

“INXENTE” VALOR CULTURAL, ETNOGRÁFICO E TURÍSTICO

O patrimonio inmaterial galego, integrado por todas aquelas celebracións de gran tradición que singularizan o folclore e o calendario festivo da nosa terra, como no sur lucense o Oso de Salcedo en Brollón, o chantadino Entroido Ribeirao na parroquia de Santiago de Arriba, ou a saída do Meco e as Pampórnigas en Quiroga, “representa unha inxente riqueza de alto valor cultural, etnográfico e tamén turístico”, según suliñou o delegado de Cultura da Deputación, Mario Outeiro.

O Oso de Salcedo, en A Pobra do Brollón, ou a celebración do Entroido Ribeirao na parroquia chantadina de Santiago de Arriba, constitúen dúas das mostras máis significativas do patrimonio inmaterial do sur de Lugo. Arquivo EC.

BOLSA DE INVESTIGACIÓN EN PATRIMONIO INMATERIAL LUCENSE

Nesta liña de traballo, o organismo provincial aprobou nestes días a convocatoria dunha bolsa de formación no eido do patrimonio inmaterial que, segundo sinalou o delegado de Cultura e Turismo, ten unha dobre finalidade, tanto cultural como económica. Con esta actuación, “trátase de recompilar o traballo de recuperación do patrimonio cultural inmaterial realizado nos últimos anos e, tamén, ofrecer unha nova oportunidade laboral a mozos e mozas en paro”, explicou Outeiro.

TRABALLO CONXUNTO CON ASOCIACIÓNS, E TAMÉN NOS COLEXIOS

A bolsa de investigación forma parte do “arduo traballo de recuperación do patrimonio inmaterial do sur lucense” que, según comentou o responsable provincial, ven desenvolvendo a Área de Cultura e Turismo a través de convenios con asociacións culturais, aínda que agora se trata de “ir máis aló” e plasmar todo ese traballo en libros ou en soportes audiovisuais. Asimesmo, Mario Outeiro destacou que outra fórmula para dar a coñecer o noso patrimonio inmaterial é a edición de unidades didácticas para o alumnado de primaria e secundaria, como ferramentas para o traballo do profesorado nas aulas. “Temos un inxente patrimonio cultural inmaterial que non só temos a obriga de recuperar, coidar e protexer senón tamén de divulgar e coñecer para que actúe como polo de atracción turística, e consideramos que un primeiro paso para lograr estes obxectivos é que sexa obxecto de traballo nos colexios”, destacou Outeiro. Na romaría dos Remedios da da Ermida aparece o Meco quen, según a tradición, acompaña á procesión vestido de vermello, enmascarado e cunha vasoira de toxos coa que abre paso á comitiva coas Pampórnigas, dous xigantes de rechamantes vestiduras. Ao chegaren diante da igrexa, as Pampórnigas descansan e o Meco loita cos asistentes para que non entren á misa, mentres os veciños tratan de enganalo botándolle moedas. Documentada dende o século XIX, esta festa esmoreceu nos anos 70 para recuperarse con forza nas últimas décadas.

Deixa unha resposta

Your email address will not be published.

Nova Anterior

Un paseo por la historia del Club Lemos

Seguinte Nova

25 N: O sur de Lugo celebrou o Día Internacional para a Eliminación da Violencia contra as Mulleres

Últimas noticias sobre ASOCIACIONISMO

A %d blogueros les gusta esto: