O novo conselleiro de Economía e Industria, o monfortino Francisco Conde López, estreuse en sede parlamentaria cunha intervención sobre a situación da planta do Oural de Cementos Cosmos. Conde López afirmou que o Goberno galego continuará co diálogo aberto coa empresa e os traballadores da cementeira para atopar unha solución que garanta a actividade.
A XUNTA “EMPREGARÁ TODOS OS INSTRUMENTOS DOS QUE DISPÓN” PARA GARANTIR A CONTINUIDADE DE COSMOS
O conselleiro de Economía e Industria sinalou que empregará “todos os instrumentos dos que dispón” para tratar de garantir a continuidade da empresa. “Podo asegurar que a Xunta, a pesar do escenario económico actual, está a facer e fará o que teña na súa man para que a actividade da fábrica e os seus postos de traballo se poidan manter”, afirmou Conde López.
ENCONTROS COA MULTINACIONAL
Neste sentido, durante esta intervención no Pleno do Parlamento galego, Francisco Conde resaltou que, días antes, o director do Instituto Galego de Promoción Económica (Igape), Javier Aguilera, mantivo unha xuntanza en Madrid cos directivos da Multinacional Votorantim, grupo empresarial do que depende a fábrica de cemento. En dito encontro, o Goberno galego manifestou a preocupación dos traballadores e da Xunta polo futuro da fábrica, e amosou a súa “total dispoñibilidade” para atopar unha solución que garanta o mantemento da actividade. Pola súa súa banda, o Grupo, que conta con plantas en León, Canarias, Andalucía e Galicia, trasladou a difícil situación do sector e a necesidade da empresa de levar a cabo unha análise das súas capacidades produtivas.
REUNIÓN COS TRABALLADORES
Esta reunión súmase á xa mantida cos representantes dos traballadores da planta de Oural, encontros que amosan a vontade da Xunta “para procurar que Cementos Cosmos manteña a actividade e o emprego na comarca”, demostrando, como destacou Conde, “que o Goberno galego está levando a iniciativa neste asunto, polo que os traballadores poden contar coa total implicación da Xunta na busca de solucións”.
A PLANTA DO OURAL “PODE SER RENDIBLE, E É NECESARIA PARA A COMARCA DE SARRIA”
“Cremos que a planta do Oural pode ser rendible, e é necesaria para a comarca de Sarria”, incidiu Conde, quen lembrou que Cementos Cosmos suma, ao seu emprego directo, un emprego inducido de máis de 400 postos de traballo, sobre todo en transporte. O conselleiro de Economía e Industria aludiu a profesionalidade dos traballadores da empresa, que están a defender “a continuidade dos empregos e da actividade” a pesar das dificultades que atravesa o sector da construción e os seus auxiliares.
Cargando ...
