O parlamentario monfortino Vicente Docasar estréase como voceiro socialista de Educación reclamando a recuperación do programa Preescolar na Casa

Docasar descartou as xustificacións económicas argumentadas polo Goberno da Xunta para a supresión deste programa educativo, “valorado en Europa como modelo a seguir”, e denunciou como causa “os axustes ideolóxicos que o Partido Popular está a facer en Sanidade, Educación, Xustiza ou Paradores”. O parlamentario monfortino lembrou que atender á infancia “é unha recomendación expresa do Comité de Dereitos do Neno de Nacións Unidas”, e que a primeira etapa da súa formación, “primordial no desenvolvemento do neno”, era o obxectivo do Preescolar na Casa. Docasar lembrou que “investir en servizos para a primeira infancia implica menos gasto futuro para atallar a tempo posibles situacións conflictivas”.