Raquel Arias animou aos concellos do sur de Lugo a unirse ao Plan Galicia Saudable

O Grupo de Desenvolvemento Rural (GDR) Ribeira Sacra entregou os premios correspondentes ao I Circuíto de Carreiras Populares, que integrou un total de oito probas celebradas noutros tantos concellos do sur lucense. Durante este evento, a delegada territorial da Xunta en Lugo, Raquel Arias, aplaudiu a iniciativa do GDR por “promover o deporte á vez que difunden e dan a coñecer a Ribeira Sacra”. Con respecto a este último aspecto, Arias resaltou que”nestes momentos de dificultade, as carreiras dinamizan os pobos que as acollen, que reciben non só aos participantes senón tamén aos acompañantes, e favorecen non só a competición senón tamén a confraternidade posterior”.

A delegada invitou a todos os concellos da Ribeira Sacra a adherirse ao Plan Galicia Saudable, plan impulsado polo Goberno autonómico en colaboración coas principais institucións e organizacións dos ámbitos educativo, sanitario, empresarial e social. No evento foron entregados os premios aos mellor clasificados, para o cal era obrigatorio participar en polo menos cinco das oito carreiras.