O monfortino IES A Pinguela está a comezar o segundo trimestre do curso cun interesante programa de conferencias a cargo de diversos profesores investigadores da Universidade de Santiago de Compostela. Esta iniciativa do centro de ensino monfortino conta coa colaboración do programa A Ponte Ensino Secundario-Universidade de Santiago, para ilustrar ao alumnado sobre diversos eidos do saber da man de especialistas en cada materia.
CIENCIA, LINGÜÍSTICA E PUBLICIDADE
Así, trala apertura do ciclo de conferencias coa intervención titulada “Física nuclear. Do corazón da materia ao interior das estrelas”, a cargo do profesor Héctor Álvarez Pol o pasado día 16, o venres 18 de xaneiro o profesor Virgilio García Trabazo falou ao alumnado de A Pinguela sobre “Lingüística indoeuropea: reconstruíndo a prehistoria das nosas linguas”, para continuar coa intervención, o día 22, do doutor José Miñones Trillo, cátedrático de Físico-química ad honorem da Facultade de Farmacia, exdecano da mesma facultade e expresidente da Comisión Interuniversitaria de Galicia, que falou sobre “A importancia da auga na orixe da vida”. A programación de xaneiro culminou coas conferencias “Heroísmo e heroes na Ilíada”, a cargo do profesor Ángel Ruiz Pérez, e “Persuasión publicitaria”, impartida por Marisa del Río Araújo.
TEMAS DE ACTUALIDADE
O ciclo de conferencias organizadas polo IES A Pinguela continuará ao longo do mes de febreiro, en torno a temas como as matemáticas na vida cotiá, o emprendemento empresarial e a responsabilidade no consumo.
Cargando ...
