O Plan Xeral de Ordenación Municipal de Monforte estará exposto ata o 2 de abril

Os documentos do Plan Xeral de Ordenación Municipal de Monforte están expostos á cidadanía na Casa da Cultura. EC.

A aprobación inicial do Plan Xeral de Ordenación Municipal (PXOM) de Monforte tivo lugar no pleno extraordinario celebrado o pasado 21 de decembro e, trala súa publicación no Diario Oficial de Galicia, iniciou a fase de exposición pública na Casa da Cultura de Monforte, para permitir que a cidadanía coñeza os pormenores desta proposta e poidan facer as alegacións oportunas.

AMPLIACIÓN DO PRAZO «PARA QUE A CIDADANÍA TOME COÑECEMENTO DO PXOM»

O prazo de exposición pública que se estableceu nun primeiro momento, e según a normativa vixente, remataba o 2 de marzo, pero na última sesión plenaria celebrada no Concello de Monforte foi aprobada unha moción de urxencia presentada polo grupo municipal do Partido Popular, pola que se amplía o prazo de exposición ata o 2 de abril. A normativa establece a este respecto a posibilidade de ampliar este prazo, pero cun límite, o da metade do prazo inicial, a pesares de que o Partido Popular solicitara contar con dous meses máis «para que a cidadanía poida tomar coñecemento deste Plan». Os populares alegaron «detectar descoñecemento xeral entre os cidadáns sobre este documento» logo das sesións informativas que ofreceron a mediados deste mes. A petición contou co apoio do Bloque Nacionalista Galego e do Partido Socialista, que durante dita sesión plenaria manifestaron a súa vontade de que ningún cidadán quedara sen coñecer o Plan Xeral, e que para iso este documento estaría en exposición ata que a Xunta de Galicia o permitise. Deste xeito, o Plan Xeral de Ordenación Municipal de Monforte permanecerá á disposición da veciñanza un mes máis do previsto, ata o 2 de abril, data de remate de presentación de todas as alegacións que a cidadanía estime oportunas. Todas as alegacións presentadas serán analizadas polo equipo redactor do Plan, que informará sobre elas e incluirá no Plan as que estime oportunas. Este documento final será remitido á Xunta de Galicia para a súa aprobación definitiva.

No recinto expositivo da Casa da Cultura habilitouse un posto de atención e consulta técnica previa cita. EC.

POLÉMICA POLÍTICA SOBRE A VONTADE DE LEVAR ADIANTE O PXOM

Este procedemento non estivo exento de polémica política. Así, no Pleno de decembro a aprobación inicial do PXOM contou co voto favorable do BNG e de tres concelleiros do PSOE, coa abstención dunha concelleira socialista que alegou «descoñecemento» do PXOM, e do PP, que explicou a súa abstención aludindo ao número de inmobles que quedan fóra de ordenación e da delimitación de zona urbana, ao trazado da ponte de Aceña Nova, e tamén para permitir a exposición pública do Plan. Pola súa parte, o PSOE deixou claro que «se estivesen no goberno municipal farían outro Plan», e de feito presentaron 25 alegacións, pero votaron favorablemente «porque Monforte necesita un Plan Xeral con urxencia», dado que para posibilitar a exposición pública era preciso aprobalo por maioría absoluta. Os socialistas recriminaron aos populares que no Pleno de xaneiro ameazaran con non apoiar o documento final «salvo que se corrixa sustancialmente», alegando que se tiñan comprometido dende o principio a levar adiante o PXOM, feito que negaron os populares. Os socialistas afirmaron que «se o Plan non se aproba por unanimidade, non votaremos a favor aínda que Monforte se quede sen PXOM». Pola súa parte, o Alcalde suliñou no Pleno de decembro que había moitas cousas no Plan coas que non estaba de acordo, pero destacou que o PXOM «é o Plan de todos, se o conseguimos será bo para todos e senón, será malo para a cidade». Severino Rodríguez lembrou aos populares que «a Xunta do PP lle deu o visto bo ó PXOM de Monforte». Asimesmo, Mª Xosé Vega criticou no Pleno de xaneiro o «desmarque» do PP, xa que «se todos os grupos tivéramos esa actitude, ninguén podería opinar sobre o Plan». Pola súa parte, dende ANOVA propoñeron ao Concello que promova unha charla informativa para a cidadanía.•

Deixa unha resposta

Your email address will not be published.

Nova Anterior

«Merendas con contos» en torno ao Entroido en Sober

Seguinte Nova

Feijóo apoia en Bóveda os produtos agrogandeiros “como oportunidade no camiño cara o crecemento”

Últimas noticias sobre INFRAESTRUTURAS

A %d blogueros les gusta esto: