O sur de Lugo prepara o Entroido

Puchos e volantes no Entroido de Chantada. Arquivo EC.

Ninguén pode resistir o feitizo do Entroido, que cada ano pon de acordo a todo o mundo para transformar a faciana de xentes e rúas nun gran sorriso de festa. Concentrados nun día ou espallados entre a fin de semana e o martes de Entroido, as celebracións sucédense por toda a comarca.

FESTA-CHOCOLATADA O SÁBADO DÍA 9 EN SAN CLODIO, CON 1.500 EUROS EN PREMIOS

Así, en Ribas de Sil organizan o tradicional Desfile de Comparsas o sábado 9 de febreiro, cando a partir das cinco da tarde saen as comparsas para desfilar polo circuíto de San Clodio ata desembocar na Praza do Concello, onde ten lugar a entrega de premios. Serán 1.500 euros os que se repartirán en diversos premios, según a calidade e orixinalidade que amosen os participantes e que deberán ser valoradas polo xurado. A xornada rematará cunha festa amenizada por unha orquestra, e na que haberá coma sempre unha chocolatada.

MADAMAS, DANZANTES E OSO EN SALCEDO, CON PREGÓN DE TONHITO DE POI

Unha das citas máis singulares do Entroido lucense está na parroquia de Salcedo, en A Pobra do Brollón, coa salida do Oso e os seus criados na tarde do luns 11 de febreiro. A xornada deste día grande en Salcedo comeza ás catro da tarde, cos cantos de cego, e ás cinco, veciñanza e visitantes, cada vez máis numerosos, correrán ó Oso e andarán finos para non caer en mans dos criados e acabar coa cara tiznada. O Oso e os criados darán unha tregua á noite, para acudir á cea popular a partir das nove, amenizada por dúas orquestras. Pero o programa de Salcedo ten tamén teatro (o sábado 9 ás dez da noite, e o domingo 10 á mesma hora), pregoeiro de excepción (Tonhito de Poi, o domingo 10 ás 17 horas) e moita música (o domingo ás 20 horas actuará a cantante Tita Lijo, despois da función de teatro desde mesmo día haberá verbena coa orquestra Charleston, e o martes 12 rematará o Entroido coa verbena, a partir das oito da tarde, a cargo da orquestra Sabor Latino).

DESFILE EN A POBRA CON PREMIOS Á PARTICIPACIÓN

Asimesmo, en A Pobra continuarán os obradoiros de antefaces, caretas e disfraces o 1 e o 8 de febreiro, na Casa da Cultura de cinco a sete. Xa o sábado 9, terá lugar o Desfile de Disfraces, Comparsas e Carrozas, que partirán do cruce da estrada de Sáa ás cinco da tarde, e ao remate, haberá pinchos e baile na Casa da Cultura, a cargo da Charanga Terras do Bibei. Os interesados en participar no desfile deberán anotarse na Casa da Cultura ou no teléfono 982 430 546 antes do 8 de febreiro, e recoller o seu número o sábado no Concello a partir das 16 horas. Os participantes deberán presentarse no punto de saída do Desfile 20 minutos antes da hora prevista de inicio. En canto ós premios, establécense dúas modalidades, según a procedencia dos participantes. As carrozas do propio municipio optarán a tres premios (175, 125 e 75 euros), así como as comparsas locais de 25 persoas; as comparsas de Brollón de 5 a 14 persoas loitarán por tres premios de 100, 80 e 50 euros, e as comparsas locais de 1 a 4 persoas optarán a cinco premios (50, 40, 30, 20 e 10 euros). Para os participantes procedentes de fóra do municipio de Brollón haberá tres premios por categoría. Así, establécense para as carrozas de fóra premios de 75, 50 e 30 euros, así como para as comparsas de 15 persoas, mentres que as comparsa de 5 a 14 persoas optarán a 50, 40 e 25 euros. Todas as carrozas inscritas recibirán un premio de 40 euros, sen prexuicio dos premios que acaden, e as comparsas de 15 ou máis compoñentes levarán outro de 20 euros.

SARRIA INCENTIVA A PARTICIPACIÓN DA COMARCA

O domingo 10 de febreiro, Sarria celebrará o Gran Desfile de Carrozas e Comparsas, que partirá dende o barrio da Estación ás 17,30 horas e percorrerá as principais rúas da vila. Para que o desfile sexa todo un éxito, dende o Concello de Sarria convocan aos interesados en tomar parte neste desfile, tanto nas categorías de adultos como de infantís (en carrozas e comparsas), de procedencia local ou foránea, a unha reunión que se celebrará o vindeiro 8 de febreiro ás 20,30 horas na Casa do Concello. Esta reunión, á que deberán asistir con carácter obrigatorio todos aqueles grupos inscritos antes do 7 de febreiro ás 14 horas, para aclarar dúbidas sobre o desenvolvemento do desfile, e determinar con exactitude o posto que cada grupo participante ocupará durante a marcha. Asimesmo, e para incentivar a participación nesta convocatoria festiva, o Concello de Sarria concederá axudas a cada grupo da comarca que se inscriba no Desfile. A contía será de 100 euros para as carrozas, e de 60 euros para as comparsas. En canto ós premios para os participantes procedentes da comarca de Sarria, as carrozas de adultos con 15 ou máis integrantes optarán a dous premios, de 300 e 260 euros, e as de menos de 15 integrantes disputarán dous premios, de 200 e 150 euros. As comparsas para adultos optarán a un premio de 250 euros e outro de 200 na modalidade de 15 ou máis integrantes, e as de menos de 15 membros terán un premio de 180 euros e outro de 150. Pola súa parte, na modalidade infantil, as carrozas de máis de 15 membros optarán a dous premios, de 250 e 200 euros, mentres que as de menos de 15 integrantes disputarán dous premios, de 150 e 100 euros. As carrozas e comparsas procedentes de fóra da comarca de Sarria poderán optar a un premio de 200 euros as primeiras, e de 100 euros as segundas. Para a concesión dos correspondentes premios en cada modalidade, o xurado valorará “a orixinalidade dos disfraces, a posta en escea, a simpatía e a gracia dos participantes”, según se especifica nas bases de dito concurso. Os interesados en tomar parte no Desfile de Entroido de Sarria poderán informarse e realizar a inscripción na Oficina de Información Xuvenil do Concello de Sarria, por teléfono no 982 53 50 00 ou por e-mail ao omix@sarria.es.

ENTROIDO RIBEIRAO: TRADICIÓN E XOGOS POPULARES PARA TODOS EN CHANTADA

A parroquia de Santiago da Riba, en Chantada, xa están metidos no Entroido, logo do Domingo Lambedoiro. A vindeira cita é o 3 de febreiro ás 16,00 horas, cando se celebrará o Domingo Corredoiro con pinchos, viño, sorteo sorpresa e a música do grupo de gaitas “O de aquí e os de aculá”, de Vigo. Boa comida, música da terra e xogos populares para todas as idades con opción a premios para os gañadores tamén se disfrutarán de novo o Domingo e o Martes de Entroido, día no que rematará a festa cunha merenda de torriscos, castañas e chourizos, e con entrega de gominolas e agasallo para todos os nenos e nenas presentes. Unha cita imprescindible cos puchos e volantes, figuras únicas do Entroido lucense.•

Deixa unha resposta

Your email address will not be published.

Nova Anterior

Anova considera que os Orzamentos da Xunta reflicten unha “clara tendencia ao roubo ás clases máis indefensas”

Seguinte Nova

Lugo presume de gastronomía en Fitur

Últimas noticias sobre ASOCIACIONISMO

     
A %d blogueros les gusta esto: