A tradicional cita de febreiro, apadriñada polo actor da TVG Roberto Vilar, completarase con mercados sobre o cocido na Praza de Abastos

Por quinto ano consecutivo, a Delegación Sur da Asociación Provincial de Hostelería de Lugo (APEHL) organiza durante o mes de febreiro o “Estase Cocendo”, un evento gastronómico que trata de aproveitar o protagonismo do cocido en cada un dos rincóns lúdico-gastronómicos da vila do Cabe.

SABORES E LECER EN TORNO AO COCIDO

“Con gran esforzo por parte da Delegación Sur da APEHL”, según recoñeceu a súa responsable, Beatriz Vila, a aposta deste colectivo pola dinamización local a través da gastronomía fará posible que restaurantes, cafeterías, bares, hoteles, pensións, casas rurais e pubs que queiran adherirse a esta iniciativa acheguen o mellor sabor e o mellor espíritu lúdico do Entroido a veciños e visitantes. Según é tradición no “Estase Cocendo”, os restaurantes adheridos darán menús de cocido, e os bares e cafeterías tapas deste prato. Pola súa banda, os aloxamentos que se adhiran a este programa ofrecerán prezos especiais durante todo o mes, e os pubs ofertarán unha serie de festas nas súas instalacións.

MERCADO GASTRONÓMICO SOBRE COCIDO NA PRAZA DE ABASTOS

Como novidade, a Delegación Sur da APEHL organiza mercados gastronómicos en torno ao cocido na Praza de Abastos de Monforte, acompañados dalgunha degustación desta especialidade. Asimesmo, esta edición estará apadriñada polo actor e presentador da TVG Roberto Vilar, a quen se lle concederá o título de Compadre Estase Cocendo 2013.