Preto de 300.000 euros para mellorar as pistas da comarca de Chantada

Investimento autonómico nos últimos meses en camiños de Chantada, Carballedo e Taboada

A delegada territorial da Xunta en Lugo, Raquel Arias, visitou as obras de reparación no vial de acceso á cooperativa ICOS de Chantada, acompañada polo alcalde da localidade, Manuel Varela, e o presidente de ICOS, Javier Taboada. GPDT.

A aposta pola mellora das condicións de vida no medio rural esixe que a complexa rede de pistas e camiños que vinculan os núcleos rurais e os centros produtivos do seu entorno estean en perfecto estado. Así, as actuacións no sur de Lugo vinculadas ao Plan Estratéxico de Infraestruturas do Medio Rural (PEIM) seguen en marcha, e nos últimos meses supuxeron un investimento por parte da Consellería de Medio Rural e Mar de preto de 300.000 euros en diversos puntos da comarca de Chantada.

MÁIS DE 90.000 EUROS PARA ACONDICIONAR AS PISTAS DE ICOS

Un dos accesos que foron obxecto de mellora dentro destas actuacións é a pista de entrada á cooperativa ICOS, en Chantada, que presentaba un deterioro producido polo tráfico pesado nos 1,4 quilómetros de vial, e cuxa mellora contou cun investimento de 91.600 euros. Para supervisar as obras de acondicionamento desta pista, a delegada territorial da Xunta en Lugo, Raquel Arias, visitou a zona o pasado 7 de febreiro, quen lembrou o “importante papel que desenvolve a cooperativa Icos na economía local da comarca e mesmo do conxunto da provincia”. Precisamente, a importancia desta cooperativa xustifica “á perfección” a actuación levada a cabo nas pistas de acceso, xa que o PEIM “busca a dinamización da base produtiva progresando nas infraestruturas, e mellorando as oportunidades e a calidade de vida para poder fixar poboación no rural”. No conxunto da comarca de Chantada, as actuacións do PEIM nos últimos meses melloraron preto de 8 quilómetros de viais.

ACCIÓNS EN TABOADA E CARBALLEDO

Ademais das pistas de acceso á cooperativa ICOS, están a ser obxecto de acondicionamento os camiños de acceso aos núcleos de Outeiro, Costiña (A Bouza), Seixas (Bembibre) e Gulfar, así como a pista LU-P 1809 a Esperante, no concello de Taboada, cun investimento de 103.808 euros. En canto a Carballedo, as actuacións supuxeron un total de 83.567 euros, e afectan a 3,7 quilómetros de camiños situados nas parroquias de Furco, Aguada, Marzás e Veascós. Respecto da importancia destas actuacións, Raquel Arias destacou que estes viais son ás veces os únicos accesos aos núcleos poboacionais, polo que “é preciso o seu mantemento para garantir a seguridade do transporte escolar ou agrícola, entre outros”.

Deixa unha resposta

Your email address will not be published.

Nova Anterior

Novo couto de pesca en Taboada

Seguinte Nova

Todo listo en Quiroga para a XIII Mostra do Aceite o 24 de febreiro

Últimas noticias sobre ECONOMÍA

   
A %d blogueros les gusta esto: