A promoción dos nosos produtos agroalimentarios de calidade segue a ser unha das prioridades nas liñas de traballo que están a desenvolver dende a Consellería de Medio Rural e Mar. Os responsables deste departamento autonómico anunciaron nestes días as novas orientacións para relanzar a calidade da produción agroalimentaria galega nos mercados nacional e internacional.
SELO DE CALIDADE ÚNICO “PERO SEN PERDER A IDENTIDADE PROPIA DE CADA PRODUTO”
Así o expresou a conselleira de Medio Rural, Rosa Quintana, trala xuntanza mantida en febreiro cos presidentes dos cinco consellos reguladores das denominacións de orixe vitivinícolas galegas. Nesta reunión, Quintana anunciou que dende o seu departamento está a traballar na creación dun selo de promoción único baixo o que se ampararán todos os produtos agroalimentarios de calidade de Galicia, “sen que perdan a súa identidade propia”.
TRANSMITIR “UNHA CULTURA E UNHA CALIDADE PROPIAS A TRAVÉS DO VIÑO” CON ESTRATEXIAS CONXUNTAS EN ENOTURISMO
Con respecto ao viño, Rosa Quintana anunciou tamén diversas novidades. Así, a conselleira de Medio Rural destacou a “necesidade de traballar nunha gran feira do viño en Galicia que sexa potente, capaz de atraer a outras denominacións de orixe do resto de España” e, incluso, doutros países para que “sexamos capaces de transmitir co viño unha maneira de ser que é a do galego, unha cultura, unhas tradicións e tamén unha calidade”. A titular de Medio Rural explicou que a intención é unificar criterios de promoción co resto de departamentos que teñen competencia en materia de enoturismo e promoción “para traballar xuntos cara unha mesma dirección” e potenciar así conxuntamente as rutas do viño. Con esta medida, dende o Goberno galego buscan “sumar esforzos e aproveitar sinerxias na dinamización das rutas para afinar e agrupar as accións”, explicou Quintana. Esta estratexia conxunta pretende poñer en valor o traballo desenvolvido polas rutas e por cada un dos axentes implicados neste eido, tanto dende o sector privado (adegas e establecementos implicados na promoción) como dende a Administración.
MÁIS AXUDAS PARA VENDER FÓRA OS NOSOS PRODUTOS, E PARA FOMENTO DA CALIDADE
Durante a reunión cos responsables das zonas vitivinícolas de Galicia, a conselleira de Medio Rural e Mar lembrou o “compromiso do Goberno galego coa promoción e internacionalización dos nosos produtos”. Neste sentido, Medio Rural triplicou para este ano os fondos para aumentar a calidade e primala sobre a cantidade, cun orzamento total de 3,5 millóns de euros. Asimesmo, as axudas á promoción aumentaron un 50%, acadando un orzamento de 1,5 millóns de euros en achegas para a internacionalización dos produtos nos mercados de terceiros , cun incremento ademais para as axudas á promoción dos produtos con Denominación de Orixe Protexida no seo da Unión Europea. A reunión cos presidentes dos cinco consellos reguladores de Galicia centrouse no repaso da situación do sector. Neste sentido, Quintana lembrou o éxito de Galicia ao acadar, no eido da Política Agraria Común, o mantemento dun sistema acotado de produción ata o 2030 “que fai primar a calidade sobre a cantidade e que, polo tanto, beneficia á nosa Comunidade”.
