As máis de 6.000 hectáreas de propietarios descoñecidos pasarán ao Banco de Terras xestionadas pola Xunta

O convenio firmado entre a Consellería de Medio Rural e a subsecretaría de Hacienda y Administraciones Públicas del Estado sobre a xestión de fincas con vocación agraria existentes en Galicia e pertencentes ao patrimonio do Estado permitirá que se integren no Banco de Terras. Esta medida permitirá a posterior cesión do seu uso e aproveitamento a terceiros; así como o seu posible alleamento a favor da persoa ou entidade á que se lle cedeu a súa explotación. Galicia é a primeira comunidade en suscribir este tipo de convenio, permitindo aos propietarios de explotacións agrogandeiras ter á súa disposición máis terra con capacidade produtiva, e así poder redimensionarse e abaratar os custes de produción. O prazo para presentar solicitudes será ata o 30 de abril nas oficinas de Agader ou nas Oficinas Agrarias comarcais.