Celebrarase no Oca Augas Santas Balneario & Spa Resort dende finais de abril ata primeiros de maio

Máis de 90 golfistas de 24 países inscribíronse xa para participar no Ocho Golf Ladies Open Galicia que se celebrará entre a última semana de abril e a primeira de maio no Oca Augas Santas Balneario & Spa Resort de Pantón. Esta proba, que forma parte do circuíto Ladies European Tour Access Series, é a única que se celebra en España dentro deste certame que abrangue 14 probas en oito países diferentes e que constitúe o evento de maior dotación económica desta categoría. Agárdase que na proba participen 120 golfistas de máis de 40 nacionalidades, e consiste nunha proba puntuable para o World Rolex Ranking, o máis prestixioso do mundo no golf feminino. Asistiron á presentación o responsable do Comité de Profesionais da Real Federación Española de Golf; o presidente da Federación Galega de Golf; o responsable comercial do Ladies European Tour; o responsable do Campo de Golf Augas Santas; o subdirector xeral de Deportes; os patrocinadores do evento; así como o alcalde de Pantón e representantes da Deputación de Lugo e do Consorcio de Turismo Ribeira Sacra.

OFERTA DIFERENCIAL DE TURISMO

A directora da Axencia de Turismo de Galicia, Nava Castro, recalcou na presentación do evento que a celebración desta proba en Galicia contribúe a posicionar a oferta diferencial de turismo de golf da nosa comunidade, que combina a práctica deportiva (cunha infraestrutura dotada con 21 campos de golf) co goce do termalismo e a enogastronomía. Nava Castro indicou que a celebración deste torneo en Oca Augas Santas Balneario & Golf Resort de Pantón reforza a aposta de Turismo de Galicia pola calidade. “Trátase do campo de golf galego certificado co distintivo Q de Calidad Turística”, resaltou.