Todo a punto para abrir o calendario das feiras do noso viño

• Chantada celebrará a XXXI Feira do Viño do 8 ao 10 de marzo, con catas comentadas, orquestras e 16 adegueiros •En marcha o “Mes de Amandi”, con actividades cada semana, previas á XXXIII Feira do Viño, decana da nosa zona

Xa está todo disposto en Chantada para celebrar, do 8 ao 10 de marzo, a XXXI Feira do Viño, que este ano incorpora máis adegueiros e un bo programa de orquestras, ademais de manter as interesantes catas comentadas en diversos locais da vila do Asma.

Aínda que desaparecen do programa as xornadas técnicas doutros anos, a Feira do Viño de Chantada mantén as catas comentadas en establecementos locais. Arquivo EC.

COÑECER TODOS OS MATICES DOS NOSOS VIÑOS NAS TABERNAS DA VILA

A pesar da desaparición das xornadas técnicas celebradas outros anos, e que a situación orzamentaria da comisión organizadora non permitiu desenvolver nesta ocasión, segue a dinamización en torno ao viño de Chantada nos días previos á Feira. Así, do 5 ao 8 de marzo a partir das 8 da tarde, os amantes do bo viño poderán coñecer polo miúdo as características dos viños tintos e brancos que os adegueiros levarán á feira. Durante estas sesións, un enólogo e un persoeiro vinculado ao mundo do viño amosarán aos participantes nas catas comentadas todos os matices dun tinto e dun branco en cada sesión. As catas comentadas terán lugar en A Farangulla, A Viñoteca, Mar e Bellota, e Os Pendellos. Dende a comisión organizadora da Feira do Viño de Chantada non descartaron que estas catas poideran xa comezar o propio día 4. En canto á participación, este ano serán 16 (dous máis que o ano pasado) os adegueiros que levarán os seus viños á Feira de Chantada, que serán sometidos á cata oficial o domingo 10 de marzo ante notario. A entrega de premios realizarase días despois da celebración da feira, “para non perxudicar a ningún adegueiro”, explican dende a comisión organizadora. Será tamén o domingo o día do pregón, que este ano correrá a cargo do poeta, escritor e editor lucense Miguel Anxo Fernán-Vello. A música estará ben presente nesta edición da Feira do Viño de Chantada. Unha orquestra abrirá as sesións na noite do venres, e o sábado serán dúas as orquestras que amenizarán a verbena, como así sucederá o propio domingo. Ademais, durante o día será a música tradicional a encargada de poñer o espíritu de festa, coa actuación dos Gaiteiros do concello, a Banda de Música Municipal e varias charangas, unha delas de Chantada.

FEIRA DE OPORTUNIDADES E DE ARTESANÍA DE CHANTADA

Os comerciantes tamén tomarán parte nesta edición da Feira do Viño de Chantada, coa instalación da carpa da Feira de Oportunidades, e co espazo adicado á venda de produtos da comarca e artesanía. Durante os días 9 e 10 de marzo, un total de 27 expositores ofrecerán as melloras solucións para unha compra satisfactoria, e amosarán os máis exquisitos e coidados produtos destas terras, en horario ininterrumpido de 10,30 a 20 horas.

A Feira de Amandi xa está a celebrar “o Mes de Amandi”, previa ós actos principais dos días 23 e 24 de marzo. Arquivo EC.

HOMENAXES E APOSTA POLA MÚSICA NA XXXIII FEIRA DO VIÑO DE AMANDI

Pola súa parte, os pioneiros en celebrar o viño da Ribeira Sacra, os adegueiros de Amandi, xa presentaron o programa da XXXIII edición da súa Feira do Viño, que se celebrará a fin de semana de Ramos (o 23 e 24 de marzo). Según explicou o alcalde de Sober, Luis Fernández Guitián, a Feira ten como convidado de honra ao Concello de Pantón, e un dos primeiros actos da Feira, a apertura oficial a cargo da adega Viña Ferreiro, estará adicado a Pedro Pérez Fernández, recentemente falecido. O programa musical ten como prato forte o concerto do grupo folk Quempallou, o sábado 23 ás 23 horas, e o estreo público o domingo a partir das 13,15 horas, a cargo da Banda de Música de Sober, da muiñeira “Alfareiros de Gundivós”, obra do compositor Juan Lois. Este acto inclúe ademais unha homenaxe aos veciños e veciñas de Sober nacidos en 1981, ano da I Feira do Viño de Amandi. Pero a exaltación deste viño xa está en marcha co “Mes de Amandi”, con actos como o regalo dunha botella de viño aos donantes de sangue o próximo 12 de marzo na Unidade Móbil de Doantes de Sangue, que estará na Praza do Concello de 10,30 a 14 horas.

Deixa unha resposta

Your email address will not be published.

Nova Anterior

Monforte mellora en recollida de lixo

Seguinte Nova

Polémica pola integración do Hospital de Monforte na Área de Lugo

Últimas noticias sobre ASOCIACIONISMO

 
A %d blogueros les gusta esto: